Saturday 23 August 2008

Nnang nawn hta masha marai 3 si, 100 jan hkala, dum nta 3 hten zar mat

>

Ta Tut
Kachin Road Group
23/8/2008

Ya hte sha bin lai mat wa sai n nang nawn a majaw Miwa mungdan Yingjiang mare makau grup yin e masha marai 3 si nna marai 100 jan hkala n ba hkrum ai lam chye lu ai. Ndai nnang nawn gaw Jinghpaw Wunpawng Mungdan Shanglawt dap a daju rai nga ai Laiza muklum de du hkra bin lai wa sai re. Nnang nawn ngun tsaw dip htum 5.9 magnitude du hkra bin lai wa sai hte buga masha law law wa hkrit kajawng nga ma ai lam chye lu ai. Ndai bin lai wa sai shara ni gaw Miwa ga a Maigan masha ni law malawng sa chyai ai shara ni re.

Xinhua shiga dap kaw na gaw ndai n nang nawn hta si mat ai marai masum kawn marai langai a lam hpe sha shapoi madun da ai lam chye lu ai. Ndai gaw asak 30 ning jan re ai hpaw mi langai mi re lam chye lu ai. Masha 20 jan dang gaw grai sawng hkra kala n ba hkrum sha ai lam mung chye lu ai. Ndai ni yawng hpe Yingjiang tsi rung e tsi tsi hkam la shangu nga ai lam mung matut chye lu ai.

Ndai nnang nawn gaw dum nta 3 hpe jahten kau sai hte ngam ai 4056 daram gaw loi li hten zar hkrum ai lam chye lu ai. Ndai ni hta hpaji sharin jawng 17 lam ai hku re. N kau mi dum nta hting nu ni gaw grai hkrit ra ai madang kaw rai nga sai lam buga masha ni tsun nga ma ai hku re. Telephone hte kaga matut mahkai sumri ni hte Electricity wan sumri ni di jawng ma ai hte matut mahkai lam loi li yak hkak nga ai hpe mung buga masha ni tsun ai kawn la kap let chye lu ai.

Ndai zawn nnang nawn ai hpe Miwa Asuya ni kawn grai maja let nga na matu mung shawa ni hpe sadi jaw da ai hku re. Lai wa sai May shata e bin lai wa ai Sichuan nnang nawn a majaw masha 70,000 jan si mat ai hte hkala n ba hkrum ai masha grai law mat ai a majaw ya hten nnang nawn hte seng nna Miwa gaw grai hkrit nga ai hpe mung chye lu ai.

Template by - Abdul Munir | Daya Earth Blogger Template