Chyu rum hte Dai rum

Ta Tut
Kachin Road Group
15/9/2008

An-hte Jinghpaw Wunpawng sha ni gaw an-hte a kahpu kanau daw ang ai lam ni hpe tsun yang Chyu rum Wunpawng sha ni nga tsun tsun re ai hpe mu lu ai. Ndai lam hte seng nna la chyum hpe a tsawm sha myit yu yang grai lachyum kaba ai hpe mu lu ai majaw n dai laika ngau hpe ka dat ai hku re.

An-hte ni yawng myit yu ga. Chyu rum an nau ni kun shing n rai Dai rum an nau ni kun? Lai wa sai 1995 ning hta sadung ga e rawtmalan manau dum ai shaloi dai manau hpe Dai rum manau ngu shaming lai wa sai hku re. Ndai zawn dai rum manau ngu shaming ai gaw an-hte Jinghpaw Wunpawng sha ni gaw chyu sha rum ai ni n re ai sha shadai rum ai kanu langai a kasha ni re ai lam hpe madun mayu ai majaw re lam chye lu ai hku re.

Chyu rum ai gaw masha wa a kasha (Maigan a myu sha) hpe mung chyu shajaw ya yang gaw chyu rum ai ga rai sai hku re. Rai tim Dai rum ngu tsun dat ai hte shadai rum let kanu langai kaw na sha shangai pru wa ai kahpu kanau majing ni re ai hpe tsun mayu ai hku re. Dai majaw an-hte Dai rum jinghpaw Wunpawng sha ni gaw shada da galoi mung garum hkat ra ai. Myit hkrum let maigan wa hpe ti nang a mungdan kaw na lawan ai hku gau kau ra. Ti nang a kanu mungdan hpe masha wa a lata de gaw n mai bang kau na re ngu......

Matut Hti Na...

Hti Ngut Sai...

Tsin yam ni kawn lawt hkra

Ta Tut
Kachin Road Group
23/8/2008

Dai ning laman e Mungkan ga e masha law law si jawng ai baw tsin yam kaba ni hkrai hkam sha nga ai hku re. Ndai tsin yam ni hpe hkam sha nga ai hta an-hte Jinghpaw Wunpawng sha ni mung lawm nga ai hku re. Miwa Mungdan hta mung lai wa sai May shata hta bin lai wa ai, n myit mada da ai sha du sa wa ai Nnang nawn tsin yam kaba a majaw masha 70,000 jan si jawng ma ai hte masha law law mung dum nta sha mat, hkala n ba hkrum let grai yawn na zawn rai hkra bin lai wa sai hku re.

Dai zawn Miwa ga e nnang nawn rai n bin shi yang Myen Mungdan lawu mung de mung Nargis laru kaba bin ai majaw masha 100,000 jan si ma ai hte ya du hkra masha law law wa naw jam jau hkrum nga ai hku re. Ndai zawn sha Asia Mungdan law law e n dai laman nnang nawn, bawm kapaw, mung masa lam shuk, laru kaba ni bin rai grai nan yawn na zawn re ai mabin in Mungdan law malawng kaw bin nga ai hku re. Ya hten mung Myen Mungdan a mungdaw langai rai nga ai Hkang Mungdaw hta hku hku ai majaw malu masha grai yak hkak nga ai hte masha ni mung si jawng ma wa ai hpe mung chye na sai.

Ndai hta ya ten Jinghpaw Wunpawng Mungdan hte Miwa Mung ga jarit na mare kaba ni rai nga ai Yingjiang, Dali, hte Laiza mayan e mung nnang nawn bai bin nga ai hte masha 3 si mat sai re lam chye lu ai hku re. Dum nta n kau mi gaw hten zar mat ai kaw du hkra jam jau nga ma ai hku re. Ndai zawn Mungkan ga e zing ri hkrum nga ai hta she an-hte shing gim masha sha da da sat hkat, nat hkat ai lam ni mung grau grau law wa ai hep mu lu ai hku re.

Goregia hte Russia hpyen dap ni, Goregia Mungdan a laknak lang rawt malan hpung langai a mang hkang a majaw ya hte sha manu mana gap hkat lai wa sai re. Ya du hkra simsa lam la ai rai tim shada da naw a daw hkat nga ai a ten re. Ndai majan a majaw masha mung law law si mat sai lam shiga ni kawn chye lu ga ai. Mungkan ga e zing ri yang zing ri, shing n rai shing gim masha shada da zing ri hkat nga ai prat de gale wa ai hku re.

Ndai zawn shada da zing ri hkat nga ai lam hta an-hte Jinghpaw Wunpawng myu sha ni mung hkam sha nga ai hku re. Hpa majaw ta nga yang Myu tsaw mung tsaw masu ni hte Asuya galaw nga ai gwi ni dip sha ai lam ni a majaw re. Ya hte sha na lu ai shiga, Nhkum Hkawn Din (Asak 15) hpe Myen hpyen la ni roi rip sat kau ai mabin ni hpe na lu ai majaw mung grai myit yawn ai hte maroi nri rai nga nngai. Myen Asuya gaw ndai ning laman Jinghpaw Wunpawng sha ni hpe dip sha ai lam hta grau grau jat wa gaw yawng mu lu ai hte maren rai nga ai.

Mungkan a zing ri ai Nnang nawn, laru kaba ni a majaw an-hte ni jam jau hkrum nga ga ai rai yang gaw dai ram maroi nri ai lam n nga na re. Ya na zawn shing gim masha shada ndai zawn masha myit n rawng ai zawn rai dip lu dip sha nga ai gaw Karai Kasang mung n ra sharawng na re ngu kam ai. Ya na zawn Myen ni an-hte myusha ni hpe dip sha ai lam hta grau grau jat wa ai gaw Wunpawng Mungdan Shawnglawt hpung ni myit n hkrum ai hte htum bru htum bra rai nga ai a majaw rai na re ngu myit sawn lu ai hku re.

Moi shawng de simsa lam nnan la ai shaloi Myen gaw an-hte Wunpawng sha ni hpe roi rip ai lam ni nau n galaw gwi ai hte hku hkau ai lam hpe grai nan si manyi ai hku kanawn mazum lai wa sai hpe mu lu ai. Dai hpang e u hpung ni law law wa garan mat ai hte shada da n ju hkat hkra Myen gaw kata lam chying lau ai hte amyu shada da sat hkat nat hkat na matu hkrai hkrai galaw nga ai hku re. Ya hten hta e KDA, NDAK, La Sang Awng Wa hpung ni gaw Myen wa a n pu de n dum shmyi shang wa ai hpe shan hte pyi n chye nga ma ai.

La Sang Awng Wa hpung ni garan mat ai kaw na an-hte Jinghpaw Wunpawng sha ni hpe Myen ni dip sha ai lam grau grau law wa ai ngu maram lu ai hku re. Ndai gaw La Sang Awng Wa hpung ni myu shada dip sha nga ai lam ni a majaw rai na re ngu mung kam ai. Hpa majaw ndai zawn mara shagun tsun ai rai ta nga yang, ti nang up hkang nga ai buga hpe rawt galu kaba wa hkra galaw na malai hpyen ngun ja hkra mung shawa ni kawn, htaw ra zing la, htaw ra galaw shangun rai dip sha nga ai ni hpe mu lu ai majaw re.

Ndai hta Myen a garum ai lam lu la hkra mung Myen e shangun ai yawng ngu na hpe galaw ya nga ai lam ni mung nga ai. Hpyen palawng tsawm tsawm re ai hpun nna Myitkyina manau hta manau lu nau ai hpe ti nang hkrai ti nang Asuya langai zawn re mu mada nga ai lam ni a majaw mung rai na re. Ndai zawn galaw nga ai lam ni gaw Mungmasa lam galaw nga ai u hpung langai hte n bung ai sha Maigan hkan na zawn Ganstar kaba langai zawn rai nga ai hpe ti nang hkrai ti nang dum nga yang gaw grai mi she kaja na.

Ndai sha nnga ti nang Shawnglawt hpung kanu rai nga ai Wunpawng Mungdan Shawnglawt Asuya KIO/A mung mung shawa ni ra sharawng ai lam ni hta gwi gwi tsap nang ai lam ni nau n nga wa ai daram rai wa ai hpe mung maram lu ai hku re. Hpa majaw ta nga yang lai wa sai Myen a Mungdan gaw da tara ra lata poi hta madi shadaw ai lam ni gaw n galaw ging ai lam ni rai na re ngu mung mu mada ai majaw re. Bai ti nang up hkang gin ra hta amyu sha ramma ni law law wa hten zar wa ai hpe madang du hkra n pat jasan ai lam ni a majaw mung rai na re ngu kam ai.

Ndai zawn amyu sha ni a gawng malai u hpung ni wa mung masha a madi shadaw ai lam ni n lu ai sha ti nang ra sharawg ai lam ni hpe sha tam nga yang gaw an-hte myit mada da ai Wunpawng Mungdan gaw du na grai naw tsan la nga ga ai. Tsan ai ngu ai hta kade mi rai a ta? 10 ning kun? 50 ning kun? 100 ning kun? 1000 ning kun? Bai myit yu ga. An-hte du daw sai hkaw ai lam ni gaw grai law mat sai. An-hte rawt malan a matu jaw da ai a rang ni grai law mat sai. Na a arang gaw a myat n pru nga ai hpe dum nga ai kawn Wunpawng sha ni myit yu ga.

Myu sha rawt malan lam n awng dang ai gaw Mungmasa u hpung u hpawng ni a majaw hkrai gaw nrai nga ga ai. An-hte mung masha ni mung marai kade wa mi rawt malan lam hta myit lawm let madi shadaw ga a ta? A myu sha langai mi rawt galu kaba wa na matu gaw u hpung u hpawng langai hkrai sha galaw ai lam hte awng dang na gaw n mai bin nga ga ai. Mai kaja ai lam a majaw kalang lang gaw masha wa a npu e mung nga ra ga ai. A ten tup ti nang hkrai n tsa kaw gaw n mai nga na re ngu mung kam ai.

Tsun ga nga yang ya ten an-hte Wunpawng sha ni gaw lawu mung ga na Aung San Su kyi a hpung rai nga ai NLD ni ra sharawng nga ai hte maren Myen Mungdan hpe Democracy lu hkra galaw la ga ngu ai gaw mai kaja ai lam gaw rai nga ai. Rai tim an-hte ra sharawng ai gaw hpa rai a ta? Myit yu ga, nang Democracy mi lu tim masha wa a mayam tai nga ai majaw n kam hkam nna rawt malan bu nga ai Mungdan ni mungkan hta grai law nga ai. Nang Democracy lu tim masha wa a mayam gaw mayam sha re.

An-hte myu sha ni gaw Hkrisatan law ai a myu re ga ai. Aung San Su Kyi wa shi mung da hpe Democracy lu jang Bukda mungdan ngu ai mying hpe galai ya na da i? Shing gim masha langai mi ngu ai gaw ti nang hkam hpa nga ai makam masham langai mi hpe yawng a ntsa e sha tawn da myu ai baw hkrai rai nga ai. Myen ngu ai ni gaw mung masha hte Asuya a myit jasat langai sha re. Ya ten hta e Asuya kawn yang hpe dip sha nga ai majaw sha yawng mayawng maren sha re ai zawn zawn rai nga ai re. Lama wa mungdan Democracy lu mat tim an-hte Jinghpaw Wunpawng sha ni gaw masha wa a mayam naw tai nga ra na re.

Democracy lu mat ai hpang she an-hte ni an-hte na mungdan an-hte ra ga ai law ngu nang kade mi jahtau tim Mungkan ga gaw nang hpe n madat sana sha re. American law EU law UN law nga ai ni mung yawng mayawng na a mara hkrai shadu mat na ndai. Dai re ai majaw ya ten kaw na Mungdan lu hkra shakut la let Democracy ngu ai hpe ti nang a Jinghpaw Wunpawng Mungdan kata e ti nang hkrai ti nang bang la ga. Masha wa sa law nga yang sa ai baw gaw n mai na re.

Ndai zawn mungdan kasat la ga nga yang Mung shawa a ngun hkrai gaw n mai na re. U hpung U hpawng langai hkrai a a tsam rau sha mung gaw n mai na re. Yawng rau sha jawm kasat la ra ga ai. Dai rai yang she lahta e kada ai hte maren masha ni dip sha ai lamni a tsin yam kaw na lawan ai hku lu hpru wa na re ngu kam ai. KNU ni ya du hkra hpa majaw masha wa hpe lu gum lang ai hte masha wa a mayam n tai ai rai ta nga yang KNU gaw Aung San Su Kyi hpe mung madi shadaw ai lam ni loi li nga ai zawn ti nang a makau e nga ai Mungdan ni hte kanawn mazum ai lam masan sa ai a majaw mung re.

KUN hte gajarit rai nga ai Thai mungdan a garum ai lam KNU ni gaw law law lu la ai hte laknak ni mung grai kumzup nga ai hku re. Mung shawa mung madi shadaw ai hte U hpung U hpawng shada da kanawn mazum ai lam ni grai hkrak ai majaw re. (Ndai hta DKBA ngu ai ni n lawm ai hku re) Shan hte mung Myen mung Demoracy lu hkra sha kasat nga ai gaw n rai na re ngu kam ai. Mung shawa mung Myen Mung Democracy sha lu ai hte gaw n myit dik na re ngu kam ai.

Hpa hpe tsun mayu ai ta nga yang ya ten an-hte Jinghpaw Wunpawng sha ni gaw kadai a madi shadaw ai lam mung n nga ai sha ti nang lagaw ti nang tsap nga ai gaw yawm mung n yawm, jat mung n jat wa ai baw masa rai nga ai ngu kam ai. Ngai laika shiga nkau mi hpe Miwa hte seng ai lam ni mara yang an-hte hpu nau n kau mi n ra sharawng ai hpe mung mu lu ai. (Rai tim shiga ngu ai gaw hpa baw shiga sha rai tim tang madun ai baw re ngu kam ai.) Ndai lam ni hpe yu dat yang an-hte Jinghpaw Wunpawng sha ni law malawng gaw Miwa hpe grai n ju ai zawn zawn re nga ai hpe mu lu ai hku re. Ngai Miwa ni kaja ai ngu n tsun nngai. Shaning shagu an-hte a mungdan kaw na n prang sut rai ni la hkawn mat mat re ai lam a majaw sha pyi Miwa ngu ai hpe grai n ju nga nngai.

Rai tim an-hte ni KNU zawn ti nang a mungdan hpe ti nang makawp maga la mayu ga ai rai yang gaw Miwa rau mung kanaw ra na re ngu kam ai. Tsun mayu ai gaw an-hte Jinghpaw Wunpawng Shawnglawt hpung ni mung Miwa hte kanawn let Miwa ni hte Myen ni n ju hkra galaw ra ai ngu kam ai. Hpa majaw ta nga yang, Myen ni ya du hkra Mungkan hta naw chying law sha nga ai gaw Miwa a majaw re ngu ai gaw yang chye ai hte maren rai na re ngu kam ai.

Ndai zawn Miwa hkaw na garum ai lam law law lu ga ai rai yang gaw nang ngai myit mada da ai Wunpawng Mungdan gaw kade myi n tsan na re ngu mung myit yu nga nngai. An-hte a buga e bin nga ai shing gim masha shada da zing ri hkat nga ai tsin yam ni gaw lawan ai hku hkoi mat na re ngu mung kam nga nngai. Shing n rai yang gaw an-hte ni gaw Myit mada da ai Democracy lu ai rai tim masha wa a mayam sha naw rai nga ra na re ngu kam ai.

(Ndai gaw Ngai (Ta Tut) a Mung masa myi jut sha re ai lam shana dat ai)

Matut Hti Na...

Hti Ngut Sai...

Kru gaw Langai

Ta Tut
Kachin Road Group
19/06/2008 (Repost)

Jinghpaw Wunpawng sha ni Rawang, Lisu, Maru, Lachik, Zaiwa, Jinghpaw yawng amyu 6 rai nga ai hku re. Ndai ni yang pawng dat yang amyu 6 lu ai hku re. Rai tim dai hku ngu dat yang, ndai amyu ni gaw n bung hkat ai, hkung hking n bung ai ngu nang shadut na ra ai. An-hte myu sha ni gaw pawng dat yang langai sha rai ra nga ga ai.

Hpa majaw ta nga yang, moi shawng de Jinghpaw Wunpawng sha ni manau nau yang manau wang langai mi kaw sha n dai amyu 6 hte yang pawng let amyu langai zawn sha rau ka lai wa sai ni hkrai rai nga ai majaw re.

Ndai manau ni hta Myen nlawm ai, Maigan ni n lawm ai, an-hte Jinghpaw Wunpawng sha ni hkrai re. Moi shawng e nat jaw jaw sha ai ten hta Jinghpaw Wunpawng sha ni gaw yawng hkra nat dumsa wa a ga hta langai sha rai rau hkawm sa wa sai ni rai nga ai. Dai ten hta laika hpaji mung n nga ai, Karai Kasang hpe mung n chye shi ai a ten, ndai a ten ni hta an-hte ni grai myit hkrum lai wa sa ga ai.

Hpa majaw Karai Kasang hpe chye ai a myu, Laika lu ai amyu rai wa ai shaloi n myit hkrum ai kun? Moi Maigan ni tsun ai Jinghpaw Wunpawng sha ni gaw 50 ning jan yang a myu mat mat sana ni re nga yu kaji kau sai kaw na ya dai ni 100 ning jan du hkra grin nga let rawt galu kaba wa ai a myu rai nga ai.

An-hte amyu sha ni Laika lu ngut ai hpang Karai Kasang a lam ni hpe sharin a chyin let grai rawt galu kaba wa ai hte hpa mung n chye ai Nam masha ni kawn ya dai ni Mungkan hta Kachin nga masha ni chye wa ai a myu rai nga ai.

Moi shawng de Roma hkaw hkam ni Hkrisatan ni hpe kasat shamyit nga ai a ten hta Hkrisatan ni gaw grau rawt galu kaba wa ai zawn an-hte Jinghpaw Wunpawng sha ni mung grai rawt galu kaba wa sa ga ai.

Rai tim ya dai ni an-hte myu sha ni law law wa ti nang a myu sha madang hpe malap kau let, Maigan wa a htung hking hpe yu n gun lu let, Maigan lai lai wa ai lam ni hpe myit yu yang grai myit machyi ai hku re.

Nang n nga, Ngai n nga yawng mayawng gaw Jinghpaw Wunpawng buga e naw nga ai shaloi “Ngai Maigan du yang bungli law law galaw na, gumhpraw law law wa la wa nna Jinghpaw Wunpawng Buga hpe rawt jat hkra ngai shakut na”, nga myit ai ni hkrai rai na re ngu kam ai. Ndai hku she rai yang gaw grai htap htuk ai hku re.

Rai tim myit shalai kau ai hku rai yang gaw n mai nga ai. Jinghpaw Wunpawng Buga naw ngam nga ai ni hpe “Nye a jing hku gaw n rai, shan hte a lam nga hte hpa n seng ai”, hku nga dam. Nang shachyen dat u, na a Mayu Dama n rai yang Kahpu Kanau rai nan rai na re ngu ngai kam ai.

Maigan du mat jang na a myit hta “An-hte Jinghpaw Wunpawng sha ni mung Miwa myusha ni zawn Maigan buga e ti nang a Mungdan lu hkra shakut na re”, nga myit na ndai. Myit yu ga an-hte Jinghpaw Wunpawng sha ni Jinghpaw Wunpawng Mungdan hta pyi chyat hkra n lu nga shi ai ni re.

Myusha ni yawng pawng yang pyi Myen Hpyen La ni daram rai n rai shi nga ai. Nang masha lachyawk mi hte gara hku Maigan wa a lamu ga hpe madu la na? An-hte gaw masha n gun rai n law shi ai hta ti nang lagaw ti nang tsap ai baw galaw dat yang gaw, Na a Mungdan hta masha 1 sha nga na ndai.

Dai gaw nang sha rai na ndai. Yawng rau pawng let langai sha tai ra nga ga ai. Nang hkrai sha nrai, yawng rai tim 1 sha rai ra nga ga ai. Ya ten ngai rawng nga ai nta hte ngai ga shadawn jaw mayu n ngai. Nye a yup gawk hta ngai hkrai n re ai sha manang langai mi rau rau rawng n ngai. Ja gumhpraw mang hkang a majaw rai nga ai.

Ndai hta Jinghpaw Wunpawng buga e ngam nga sai n ta na nye a yup gawk hpe grai marit ai hku re. Hpa majaw nga yang yup gawk langai mi hta manang wa rau pawng nga yang grai n pyaw ai hpe nang mung chye na ndai.

Yup gawk gaw kaji, rai gaw law, grai n shu n shang nga hkam sha na ndai. Bai nang yup ra shang ai a ten, nang yup rawt ai a ten ni gaw na a manang wa hte n bung na rai nga ai. Ndai hku rai yang nang gara hku galaw na?

Myit yu ga, myu 6 lam ai n dai Jinghpaw Wunpawng ngu ai hpe an-the yawng pawng yang 1 sha n rai yang gara hku rau nga na? Gara hku Mungdan lu na lam jahta na? Dai majaw myit hkrum ra sai.

Nang Maigan ga du nga ai wa mung, Mungdan kata naw ngam nga ta sai ni mung, Myu hte mungdan a matu nga Magam gun nga ai ni mung, Karai Kasang a mayam ni mung rau sha myit hkrum let Mungdan rawt galu kaba lam hpe jam galaw yang gaw an-hte myu ni a Shanglawt pandung gaw nang shadu ai hta grau nyi na ndai.

Dai majaw nang gara kaw nga nga ai rai tim ti nang myu hte Mungdan a matu shakut nga a yang gaw grai htap htuk ai lam rai na re ngu yawng hpe lajin dat ai law.

(P.S: Maigan ga du tim ti nang a myu shalam hta yawng hte 1 sha tai lu na matu lajin ai lam san san sha yaw shada ai hpe shana dat ai.)

Ta Tut

Matut Hti Na...

Hti Ngut Sai...

Jackie Chan a hpaji kawn hpa baw lu sharin na kun

Ta Tut
Kachin Road Group
30/07/2008

Ndai laman ngai Youtube Website e tam bram yu yang Jackie Chan a lam ni hpe loi li mahkawng lu ai hku re. Jackie Chan a sumla hkrung ni hpe gara hku galaw lai wa ai lam ni hpe a san sha sanglang dan ai "Jackie Chan: My Stunts" nga ai video clips 10 hpe mu lu na hku re.

Ngai n dai Post hpe hpa majaw bang a ta nga yang an-hte Jinghpaw Wunpawng sha ni sumla hkrung ni hpe grai gayet wa ai hpe mu lu ai majaw sharin la ai baw ni lawm na kun ngu ndai Kachin Road hta mara ya dat nngai.

Video clips ni gaw 1 kawn 10 du hkra In Order bang da ai n re ai majaw number ni hpe lata la let yu ga. Dai majaw Playlist hpe n dai kawn n mara ai sha link sha jaw da na hku re. Dai You Tube link de sa nna yu yu la ga. Link de sa na matu ndai kaw Click galaw ya rit.

Matut Hti Na...

Hti Ngut Sai...

Tau hkrau myit yu ai lam

Ta Tut
Kachin Road Group
12/06/2008 (Repost)

Lai wa sai shata lahkawng jan e Myen Mung hte Miwa Mung ni hta bin lai wa sai Maw ru hte N nang nawn a majaw Mungdan lahkawng yan hta e hkrat sum ai lam ni law law nga lai wa sai hte ya mung matut jam jau hkrum nga magan rai nga ai hpe yawng chye na sai.

Myen Mung e bin lai wa sai Nargis Cyclone a majaw a sak law law hte dum n ta, hkau na ni law law wa si ai hte hten zar hkrum saga ai. Ndai zawn Nargis Cyclone laru gaw Myen Mung a n gu law dik htum shapru ya ai Irrwaddy na hkau na 16% hpe la hpa n ngam hkra jahten kau ai lam Hkyit Pyaing.Org kaw mara da ai post lanai mi kaw mu lu ai hku re.

Ndai laru kaba bin lai wa ai majaw Yinam ta mam hpe hkyak hkyak n lu hkai sai majaw Myen Mung hta n gu n nga ai tsin yam kaba hkrum sha na lam nga ai hku re. Dai sha n ga hkau na hka hkawng ni hte hkau na galaw ai Sagaing hta mung mam n lu hkai ai majaw Myen lawu Mung na n gu ni hpe sha mari nga ai hku re.

Dai re ai majaw Myen Mung ting sha nga ai n gu ni yawng gaw Nargis Cyclone laru a majaw shawoi na hta yawm dik htum 50% daram yawm hkrat ai hte Manu ni mung rawt wa ai hpe mu lu ai hku re. Dai sha n ga Myen Mung a hpaga lam hpe myit shang sha ai ni kawn chye lu ai gaw, ya ten hta Lahkawng ning laman Myen Mung a n gu manu 118% daram rawt nga ai hpe chye lu ai hte Myen lahta Mung rai nga ai Mandalay kawn Jinghpaw Mungdaw du hkra n gu manu ni grai rawt nga ai hpe chye lu ai hku re.

Ndai zawn n gu n law ai mang hkang bin wa yang gaw Jinghpaw Mungdaw e hkau na galaw sha nga ai an-hte Jinghpaw Wunpawng myu sha ni hpang de jam jau kaba mai bin wa ai lam hpe maram mu ai hku re. Hpa majaw nga yang, Myen Mung e n gu n law ai mang hkang bin wa yang, Mung masha hta ti nang a sak hpe garau manu shadan ai Myen Hpyen Asuya gaw ngam nga ai Mungdaw shagu hta shawoi na hta grau nna n gu mari ai lam ni mai bin wa ai hku re.

Bai sha n ga, shaning shagu mari la nga ai manu hta grau yawm let, kashun la ai madang hku bin wa na masa ni hpe ngai maram lu ai hku re. Ndai zawn hkau na galaw ai ni jam jau hkrum wa ai hte rau ngam nga ai Mung masha ni a matu mung lam shagu hta jam jau hkrum wa chye ai baw re.

Ga shadawn, sau manu, gunrai manu, n gu manu ni hte kaga shing gyim gun rai ni yawng manu kaba rawt wa na madang kaw nga ai hte, Moi an-hte hka hku ga e hku hku ai zawn n gu pyi n lu ai prat bai du wa chye ai lam maram lu ai hku re.

Ngai n dai hku tsun yang yawng gaw Miwa mung naw nga ai nga tsun na hkrai rai nga ai. Rai tim Beijing Olympic poi kaba nga ai Miwa gaw ga jarit hkan e gun rai shalai ai lam ni hpe a hkyak la pat shing dang ai lam ni nga wa chye ai hte Miwa Mung kata na N nang nawn a majaw gun rai ni Jinghpaw Mung ga jarit de hpaga lam ni yawm wa chye ai hku re.

Dai sha n ga Miwa hte Jinghpaw Mung ga jarit kata e n gu shalai ai lam hpe Kani pat zasan ai zawn rai rim let shing dang nga ai gaw shaning grai na mat sai hku re. Ndai zawn shing dang ai gaw Myen Asuya ni kawn Contract galaw da ai lau ban n kau mi sha n gu htaw shalai mai ai a majaw re lam mung yawng chye na sai.

Ndai zawn hpaga hku kaba hku hkyem nga ai ten, Asuya galaw ai ni gaw hpa mung shajin ai lam ni n nga ai nga Mungkan malu masha hpung WFP (World Food Programme) kawn Asuya hpe sadi jaw da ai hku re.

Ndai zawn tsim yam ni n hkrum na matu, Jinghpaw Mung- Miwa Mung ga jarit e nga ai Jinghpaw Wunpawng sha ni hku na ya ten hpaga lam ni hta shajin ai lam ni hpe lawan ai hku galaw ra ai hku re.

Ndai hta Laiza e daju jung ai KIO/A ni hku na ti nang a mung masha ni jam jau wa na hpe tau hkrau myit sawn yu let shajin ai lam ni hte, mahtai hpe lawan ai hku tam ra sai lam tsun shana dat ai hku re.

(P.S:: Ngai, Ta Tut, a ning mu sha re ai lam shana dat ai.)

Matut Hti Na...

Hti Ngut Sai...

Masha ni galai shai wa ai zawn

Ta Tut
Kachin Road Group
11/06/2008 (Repost)

An-hte yawng chye da ai hte maren, ndai shaning laman Myen mung hte Miwa mung e bin lai wa ai Maw ru hte N nang nawn a majaw masha sen jan si mat ai hku re. Ndai zawn sum kaba sum mat ai majaw Myen Mung masha ni hte Miwa Mung masha ni mung grai myit n pyaw let yawn hkyen hkrum nga ai hte Jam jau hkrum nga ai ni mung law law wa rai nga ai.

Ndai zawn re ai sum kaba hpe Tsunami n nang naw kaba bin ai shaloi mung Mungdan law law kaw na masha law law wa si let jam jau hkrum lai wa sai hku re.

Ndai zawn Tsunami bin lai wa ai shaloi Indonesia zawn re ai Mungdan kata e, shaning law law wa gap hkat let majan bin lai wa sai Asuya hte shi hpe n ra sharawng ai ni shada kanawn mazum lam hta masan sa let Mungdan galu kaba lam hta rau sha bung li galaw sa wa let ya ten sim sa ai lam hpe lu la let Mungdan rawt galu kaba wa hkra shakut nga ai hpe yawng chye na sai.

Ya hten hta Miwa Mungdan e ndai zawn sum kaba bin lai wa ai a majaw e shaning law law wa Mung masa lam a majaw n htuk hkat nga sai Miwa Asuya hte Taiwan Asuya yen gaw 10 ning jan ganawn mazum ai lam ni n nga mat ai kaw na ya ten Mungdan Ningbaw ni zup hpawng ni galaw let garan mat ai Mung masa lam hpe bai gahkyin gaum din la na matu shakut nga masai hku re.

Ndai zawn Communist ladat hpe lang let shaning law law wa Mungkan hte ganawn mazum ai lam ni hpe n galaw let Mungdan rawt galu kaba lam hta hpang hkrat lai wa sai Miwa Mungdan gaw lai wa sai shaning nau nna shi ai shaloi kaw na shi a Mungmasa chying hka hpe hpaw let Mungkan hte ganawn mazum let, ya ten Mungkan hta lam shagu hta n gun ja ai Mungdan langai mi bin nga sai gaw yawng chye na sai.

Ya na zawn Mungkan hta kalang mi mung n hkuk hkat shi ai Democracy lu Taiwan hte Communist Mungdan kaba rai nga ai Miwa Mungdan ni ndai n nang nawn tsin yam a marang e myit hkrum wa ai lam hpe mu yang grai myit n gun lu ai hku re.

Ndai zawn Miwa mung na n nang nawn tsin yam rai n du shi ai shaloi kaw na Nargis Cyclone laru a majaw jam jau hkrum nga ai Myen Mung e gaw galai shai ai lam ni nga wa sai kun? Rim da hkrum ai Mungkan simsa lam kum hpa “Nobel Peace Prize” lu Myen Mung a Democracy Ningbaw rai nga ai Aung San Su Kyi hpe Asuya gaw ti nang htuk da ai tara hpe tawt lai let laning mi bai jat lai wa ai hpe yu yang yawng a san sha chye na na sai.

Dai hta sha n ga laru hta n si ai sha ngam nga ai jam jau hkrum masha ni hpe garum ai lam ni n galaw ai sha n ga, garum mayu ai ni hpe mung garum n a hkang n jaw rai shing gim myit zasat n rawng ai lam ni hpe Mungkan ting chye hkra n dau nga ai gaw Asuya tsun ai Democracy lu na lam yan rai nga ai kun?

Ndai zawn tsin yam kaba hkrum sha lai wa sai Mungdan ni yawng a labau ni hpe yu yang , yawng ngu na daram gaw Mungmasa lam galai shai let Mungdan rawt galu kaba lam hta yawng Myit hkrum let rau sha jawm gaw de sa wa ai hkrai rai nga ai.

Moi Japan Mungdan Number II Mungkan majan ngut ai shaloi hpyen sum let jam jau kaba hkrum sha lai wa sai hku re. Mungkan hta shawng ning nan kapaw ai Nuclear bawm a majaw masha sen kaba si jawng mat ai gaw yawng chey ai hte maren sha re. Ndai lam ni a majaw Japan gaw hpyen lam hta n gun n sadat ai sha Sut masa lam hta n gun dat let, dai ni Mungkan hta prat dep htum Mungdan langai mi rai nga sai.

Ndai lam ni hpe kasi la let an-hte Mungdan hta mung n dai zawn re ai galai shai lam ni hpe galaw ra sai. Myen sha n rai an-hte Jinghpaw Wunpawng sha ni mung n dai zawn re ai galai shai ai lam gaw lawan ai hku galaw ra sai ngu kam ai hku re. Ndai lam ni hpe Myen Asuya mung chye na wa na matu Karai Kasang kaw yawng jawm a kyu hpyi let...

Ta Tut

Matut Hti Na...

Hti Ngut Sai...

Nang Hkrai A Shanglawt Lam

Ta Tut
Kachin Road Group
17/06/2008 (Repost)

An-hte Jinghpaw Wunpawng sha ni shanglawt lawt wa ai gaw shaning 40 ning jan, 50 ning de du wa sai hku re. Ndai ram na mat ai rai tim an-hte Jinghpaw Wunpawng sha ni gahkyin gumdin ai lam, rawt galu kaba ai lam ni gaw Level Zero kaw sha naw nga ai hpe yawng chye na re.

Ndai hku ngai tsun yang nang n kam hkam na re. Ndai zawn gahkyin gumdin ai lam n nga ai gaw, an-hte Jinghpaw Wunpawng sha ni, marai langai mi hkrai hta Myu tsaw myit n rawng ai majaw n re. Jinghpaw Wunpawng sha ni daram myu tsaw myit rawng ai amyu Mungkan hta grai taw ai hku re.

Hpa majaw ndai hku tsun a ta nga yang, Maigan du Jinghpaw Wunpawng sha ni shada gahkyin gumdin let naw ku hpawng ni, htung hking hte seng ai hpawng ni, manau nau, htawng ka ka ai lam ni hpe yu yu yang chye na re.

Bai an-hte myu ni gaw rawt galu kaba ai lam hpe grai ra sharawng ai amyu re ai ngu ngai mu mada ai. Hpaw majaw shanglawt lawt ai 40 ning jan rai tim rawt galu kaba ai lam hta Level Zero sha naw nga ai myusha ni wa rawt galu kaba ai lam hpe grai ra sharawng ai rai ta nga yang, nam kahtawng hkan e naw nga ai Jinghpaw Wunpawng sha ni gaw ti nang a mare kahtawng hta Hpaji Jawng hte Naw ku jawng sha gaw lu hkra galaw da ai hkrai re ai lam mu lu ai.

Jinghpaw Mung na mare shagu kahtawng shagu ngu na daram Hpaji jawng hte Naw ku jawng ni hpe mu lu ai hkrai re. Dum nta hting gaw 3, 4 dang nga jang gaw Naw ku jawng hte Hpaji jawng lu ai hkrai rai nga ai. Ndai gaw grai htap htuk ai, rawt galu kaba lam hta grai madi shadaw jaw ai lam kaba ni rai nga ai.

Hpa majaw wa masha wa a mayam prat kaw na n lu lawt hkraw ai ta? An-hte a prat gaw shamu magang lup wa magang re ai hkum pup nawng hta lup nga ai hte bung nga sai re.

Jinghpaw Wunpawng sha ni gaw moi prat kaw na ti nang lagaw ti nang tsap mayu ai, ti nang hkum ti nang grai kam ai lam mu lu ai. Ndai zawn re ai lam ni gaw mai kaja ai ngu yang mung mai ai zawn n kaja ai ngu yang mung mai ai lam ni rai nga ai.

Hpa majaw n dai hku ngu ai rai ta nga yang, rawt malan lu ngut sai muysha, ti nang mungdan ti nang lu up hkang sai myusha, rawt galu kaba sai myusha ni rai nga ga yang gaw ti nang lagaw ti nang tsap ai lam, ti nang hkum ti nang grai kam ai lam ni gaw mai kaja ai lam rai nga ai.

Rai tim an-hte myusha ni gaw rawt galu kaba ai lam mung rai tang n du, rawt malan mung rai n lu re ai ten ti nang hkum ti nang grai kam let masha wa hte mung n htuk, ti nang hkrai ti nang Mungdan hpe hkye na lam tam ai lam gaw n mai bin shi nga ai.

Ngai, ti nang hkum ti nang hkam let ti nang lagaw ti nang tsap ai lam hpe shut ai ngu n tsun ai. Rai tim a hkying a ten rai n re shi ai, naw gahkyin gumdin ra ai majaw masha wa hte rau bung li naw galaw ra ga ai.

Na a ning mu hkrai n rai, masha wa mu ai hpe mung myit ya ra ai a hkying a ten rai nga ga ai. An-hte kaw nga nga sai Hpaji jawng ni, Naw ku jawng ni hpe rawt jat wa hkra ‘Upgrade’ galaw ai lam ni hta rau myit hkrum let galaw ra nga ga ai.

An-hte a grai htap htuk ai lai len hpe grau galu kaba wa hkra jawm shakut ra ai hte, a hkyin a ten a majaw ti nang ra sharawng ai hta yawng ra sharawng ai hpe grau manu shadan ra nga ga ai.

Nang hkrai n rai, ngai hkrai n rai, yawng hte myit hkrum ra nga ga ai ngu yawng hpe saw lajin dat ai rai...

Ta Tut

Matut Hti Na...

Hti Ngut Sai...

Hpyen majan ngut jang, Sut masa majan bai bu sa wa saga!

Ta Tut
Kachin Road Group
11/06/2008 (Repost)

Hten zar nga ai an-hte Jinghpaw Wunpawng Ramma ni a lam hpe myit yu let n dai laika ngu hpe ka dat ai. An-hte myu sha ni gaw 1994 Shanglawt hte Myen Asuya lapran gap hkat jahkring ngut sai hpang e sim sa nga sai zawn zawn re ai rai tim ya ten hta katsi majan a majaw an-hte myu sha ni a Ramma shayi shadang ni law law wa hkrat sum nga ai hpe myit yu yang grai myit n pyaw ai hku re.

An-hte myu sha ni gaw an-hte a lamu ga kata e rawng ai n hprang sut rai ni hte moi shawng de Myen mung hta grai mying gum hkawng lai wa sai ni rai nga ai. Dai prat hta gaw gara n ta mung lau ban ban ai hkrai rai nga ai. Ya Myen Asuya a n pu de lani hte lani mayu hkrum wa ai shaloi an-hte myu sha ni a shani shagu na lu sha a matu a ja a wa tam sha ra ai madang de du nga sai hku re.

Moi shawng de gaw Yi, Sun sha hkyen da yang gaw kade matsan tim shat sha gaw hkru hkra lu sha ai. Rai tim ya gaw n chyang mayam tai yang she shat ma mi lu sha ai baw prat de galai wa ai gaw yawng mu mada ai hte maren sha re. An-hte myu sha ni a lamu ga kata na n hprang sut rai ni ma mat ai majaw kun? Shing n rai an-hte a myu sha ni lagawn ai majaw kun?

Gara hku mi myit yu tim, bin wa ai lam ni yawng gaw masha wa a mayam tai nga ra ai, masha wa up hkang ai n pu e shi dang sha ai hku sha nga ra mat ai masa ni a majaw re ai lam mu lu na re.

Hka ya myu sha sut masa hte an-hte Jinghpaw Wunpawng Ramma ni hten zar wa ai hte hpa seng a ta? Myit yu yang a san sha chye na lit dai. Moi Nu hte Wa jaw ai sha hte kade pyaw lai wa ai rai tim, prat madang dep wa ai, gun rai manu ni rawt wa ai lam ni a majaw ti nang nan hpaga galaw, gumhpraw tam yang she masan sa wa ai baw re wa ai majaw Ramma ni law law wa hpaga ga let hten zar ma wa ai hpe mung mu lu ai.

Ndai prat hta Dakkasu (University) jawng lung yang, yawng chye ai hte maren Cycle sha gaw lu jawn yang she masha zawn nga ai prat bai rai wa, manang ni bu hpun ai hpe mu yang ti nang kaw mung kap mayu wa re ai lam ni law law nga ai. Ndai lam ni a majaw masha wa tsun dan ai hpaga hpe ti nang nan ta tut n chye ai rai tim loi ai zawn zawn re yang kalang ta myit sum ru yu ai lam ni n nga ai sha rawt ngoi rai galaw sa wa ai lam ni a majaw mung re.

Ya ten shiga ni hkan law law mu na re, Miwa de dut sha kau hkrum ai Jinghpaw Wunpawng shayi ni a lam ni law law wa re. Bai ja htu, lung seng htu let kan ni ya tai, 4 ya tai re ai shadang sha ni mung law law wa rai nga sai. Ndai zawn jam jau kata kaw na lawt lu hkra galaw magang, jam jau magang rai an-hte myu sha ni hten zar ma wa sai hku re.

Dai zawn Jinghpaw Mung kata nga ai Ramma ni law law hten zar wa ai kaw ti nang kasha n lawm mat na matu nga nna kanu kawa ni gaw ti nang kasha ni hpe Maigan Mungdan ni de sa na nga nna Malaysia, Thailand hte India zawn re ai Mungdan ni de Refugee bai sa galaw shangun nna gaw jam jau hkrum nga ai ni mung law law wa rai nga ai. Pyaw pyaw sha nga mat ai ni mung gaw law law rai nga sai. Rai tim jam jau hkrum nga ai ni gaw grau law nga ai.

An-hte Jinghpaw Wunpawng Ramma ni gaw Myen Mung a tsang shi (11 Gread) hpe awng let Dakkasu jan mau lu ai ni mung law law rai nga ai. Rai tim ndai jan mau lu da ai ni wa Myen Mung e hpa mung n mai galaw ai majaw ya na zawn dum bru dum bra rai Maigan du ai ni gaw du, kani ya, tsa ya hte shawa num galaw ai ni mung law law rai nga ai.

Ndai zawn re ai mang hkang ni hpe hparan na lam gaw Maigan de sa nga mat ai hte gaw n ngut nga ai. An-hte Wunpawng Myusha ni n dai zawn Maigan ga de du jawng ma let ti nang mungdan hpe n gawn mat ai hku gaw n mai nga ai. Yawng Maigan lu sa na ngu ai mung n mai bin ai lam rai nga ai. Ndai hta Myen Asuya hpe gum lang ga nga yang mung an-hte myu ni n gun n nga ai wa gara hku mung n lu gum lang nga ai. Ndai zawn re ai lam ni hpe gara hku wa hparan na shata? Mahtai gaw n nga sai kun?

Mang hkan ni yawng hpe yu dat ga nga yang, Ramma ni ya na zawn hten zar wa ai gaw Bung li n nga ai majaw re. Ti nang buga e bung li kaja nga yang kadai mung kade a bung li hte, n kaja ai lam ni hpe myit shang sha sana n re.

Maigan de du nga ai Wunpawng Ramma ni law malawng hpa majaw n hten zar ai, hpa majaw kani ya, tsa ya, shawa num n tai ai kun? Myit yu hpa rai nga ai. Maigan ga e ndai zawn re ai n kaja ai lam ni n nga ai majaw kun? Maigan ga de du nga sai Jinghapw Wunpawng Ramma ni gaw ti nang lu sha na hte bu hpun na lam ni Mungkan madan dep hkra shakut nga ai lam ni a majaw rai na re ngu kam ai. Ti nang galaw ra ai bung li ni hpe shani shana shakut nga ai majaw n kaja ai lam ni hpe n galaw mat ai re.

Ya an-hte gaw Wunpawng buga e naw ngam nga ai Wunpawng Ramma ni hpe Maigan de sa na matu hpaji jaw na malai, Wunpawng Buga e dai ramma ni hte htap htuk ai Bung li kaja ni hpe lu hpaw ya na gaw a hkyak nga ai. Ndai hta Myen Asuya a n pu e nga ai Jinghpaw buga e bung li kaja ni hpe hpaw shabrawng lu na gaw grai yak ai hku re.

Rai tim ndai lam ni hpe Wunpawng Mungdan Shanglawt hpung ni rai nga ai KIO/A, NDAK, KDA hte kaga makam masham hpung ni rai nga ai KBC zawn re ai u hpung ni hku nna bung li kaja ni hpe hpaw shabrawng let, hten zar nga sai an-hte a myu sha ni hpe hkye mawoi la ra nga ga ai. KIO/A ga law nga ai hkai sun hte hpaji lam ni hpe mu yang loi li gaw rai wa sai ngu gaw myit dum n ngai.

An-hte Wunpawng sha ni shada kam hpa ra ai, Myit hkrum ra ai. Kam hpa hkrum ai ni ku nna mung masha wa kam hpa ging ai bung li ni hpe sha galaw ra ai. Myu shada n mai dip sha hkat ai. Shada tsaw ra let myu sha rawt galu kaba lam hpe sha rau tam yang gaw awng dan na hkrai rai nga ai.

Ndai hku rai yang an-hte myu sha ni kaw kani ya, tsa ya, shawa num ngu ai gaw grai yawm mat ai hpe mu lu na hku re. Dai hta sha n ga, mung masha ni myi hpaw let lu sut lu su nga mu nga mai nga ai rai yang gaw an-hte yawng myit mada da ai Jinghpaw Wunpawng Mungdan gaw gade mung n tsan sana re ngu kam ai, bin mung bin wa na sha re.

Nang ngai naw asak hkrung nga yang Wunpawng Mungdan lu la ai Shanglawt lu manau hpe rau sha jawm dum, jawm ka lu na matu shakut ra nga ga ai. Moi gaw hpyen masa lam hte mung masa hpe kasat lai wa sai. Ya gaw makam masha hte sut masa hte mung masa hpe kasat la na a ten rai na sai ngu kam ai hku re.

Yawng myit hkrum let shakut sa wa ga ngu...

Ta Tut

Matut Hti Na...

Hti Ngut Sai...

Nye a Mung masa myi jut (Laika Ngau)

Ta Tut
Kachin Road Group
25/07/2008

Ndai laman ngai myit lu ai Mung masa mi jut langai mi hpe garan gachyan dat nngai. Ndai gaw hpa rai ta nga yang, an-hte Jinghpaw Wunpawng Myu sha ni hta myu tsaw myit kaba rawng nga ai hpe mu lu ai hku re. Ndai zawn myu tsaw myit kaba rawng ai ngu ai gaw grai htap htuk ai lam rai nga ai.

Ndai myu tsaw myi hpe an-hte ni manu shadan ai hte chye jai lang ra nga ga ai. Manang langai mi tsun ai “Yawng rau sha ngu ai gaw si gaw Jinghpaw ni a matu n rai sam ai” nga ai. Ndai gaw ya bin nga ai Jinghpaw Wunpawng sha ni a Mung masa myit zasat hte grai nan bung nga ai hpe mu lu ai hku re. Hpa sha galaw na nga tim myit n hkrum, n ju n dawng rai ai hkrai rai nga ga ai.

Ndai myit n hkrum ai lam hpe n tsun sana nngai. Ya an-hte ni a myu tsaw myit ngu ai hta myu hpe tsaw ra ai hta masha wa hpe nju ai gaw grau law nga ai. Hpa hpe tsun mayu ai rai ta nga jang an-hte myu ni gaw Myen hpe grai n ju ai a myu ni ra nga ga ai. Ndai lam gaw mai kaja ai lam kun?

Masha wa hpe nju n dawng ai ngu ai gaw Karai Kasang mung n ra ai lam chyum laika ni hkan mu na re. Nju ai lam n re yang gaw tsaw ra ai lam kun? N rai nga ai. N ju sh gu tsaw ra na nga yang gaw Mungkan n tsaw grai shuk wan a ra ai.

Hpa hpe tsun mayu ai rai ta? Nang ngai myu sum ru yu ga. An-hte gaw masha wa a mayam amyu tai nga ai hku re. Moi Myen Mungdan ting English ni a n pu e nga ai shaloi, English ni hpe gawk shale kau lu ai gaw English ni hte hku hkau hkra chye nga ai Bogyoke Aung San wa a baw nu a majaw re. Yawng myit yu ga ndai Bogyoke Aung San wa gaw English hpe nju ai hku nre ai sha English a npu e a mu pyi gun lai wa yu sai lam yawng chye na sai. Shi English ga hpe grai matsat a ni? Shi English in hpe grai n ju a ni?

Myen mungdan lawt lu na matu kaba dik madi shadaw ya ai gaw Japan hpe rau sha kasat shamyit kau lu ai a majaw re. Lama wa Myen ni wa English hpe grai n ju ai sha Japan hpe rau n kasat ga nga yang Myen mungdan gaw dai ni du hkra English a mayam naw rai nga na hku re.

Dai sha n ga Aung San wa gaw English ga hpe grai ra sharawng lai wa sai lam chye lu ai. Shi gaw nta e shi a hpyen la ni hte ga shaga yang pyi English ga rau shaga lai wa sai lam chye lu ai. E ndai lam ni hpe yu dat ga nga yang pyen wa hpe kasat na nga yang shi a lam hpe a tsawm sha chye ra ai. Shi a lai ladat hte hpaji, myit zasa ni hpe hka ja ra nga ga ai. Hpyen wa hpe tsaw ra shangun ai n rai tim n ju ai lam mung gaw n mai nga nga ga ai.

Bai langai mi gaw htawm hpang de an-hte Jinghpaw Wunpawng sha ni shanglawt lu mat ai hpang hting bu mungdan bai bin wa na rai nga ai hpyen wa hpe ya a ten kaw na kanawn mazum ai lam ni masan sa yang gaw htawm hpang e du hkra akyu hkam sha lu na re ngu kam ai hku re. Hpji lam, hpaga lam ni law law gaw mungdan langai hkrai sha n gut ai baw bungli ni rai nga ai. Hting bu wa hte masan sa yang she bungli bin ai baw hkrai rai nga ai.

Ndai lam ni a majaw an-hte a mung masa lam yan hta Myen ngu ai hpe nju ai lam n mai nga ai sha n ga tsaw ra ai lam mung n mai nga ga ai. Shi a lagaw lahkam ni hpe yu ra ai. Gawn ra ai. Shi myit ai lam hpa re ai hpe chye ra ai. Shing nrai yang an-hte Amyu ni daram a nya ai amyu n nga a sai. Dai majaw yaw a lam hpe chye da yang grau kaja na re ngu nye a mung masa mi jut hpe garan gachyan dat nngai law.

Ta Tut

Matut Hti Na...

Hti Ngut Sai...

Hpu nau Hkang ni a matu

Nbwi Sam
K-Road
23/07/2008

Hkungga tsawra ai Jinghpaw Wunpawng amyu sha ni hpang de ... Ya, nkau gaw na sai hte maren ... hpu nau Hkang mung hta kawa si si ai majaw dai asi hpe sha na matu yu ni yan hkrat wa ma ai. Manu mana law ai yu ni gaw nai mam malu masha yawng hpe htim sha, zang ayai kau ya ma ai.

Ya aten hpu nau Hkang nkau mi gaw India mung Mizoram Hkang madu uphkang mungdaw de bu htawt ma sai. Matut nna jam jau jam hka hkrum sha taw nga ai ni mung grai naw nga ai.

Ndai mabyin hpe anhte Jinghpaw Wunpawng amyu sha ni, grau nna gaw Hkahku mung na ni mung hkrum lai wa sai re. Dai Yuli hku aten hta hpu nau shada, madu jan hte madu wa shada n chye nna nai tawng mi a marang e sat hkat ai mabyin ni mung byin lai wa sai. Bai myit sumru dat yang marit maroi myi prwi si pyi hkrat na hpan re.

Maga mi hku yu ga nga yang mung, Karai Kasang gaw Yuli hku a hpang Hpakant hpe jaw ya sai re. Dai lam hpe gaw ya hpang de she matut ka na nngai. Ya aten hta grai jamjau taw nga ai hpu nau Hkang ni hpe madu dang di ai made garum ga. Alak mi n lu garum tim Akyu hpyi garum ya ga ngu sa lajin dat nngai.

Nbwi Sam Blog

Matut Hti Na...

Hti Ngut Sai...

Jin Sai Kun? (Re-post)

Ya hte sha galaw lai wa sai Myen Mungdan New Consititution shagrin na Referendum hta an-hte Wunpawng Mungdan Shanglawt KIO hpung ni yawng madi shadaw dat ai lam hpe na lu na masai. Myit hta masin n si, maroi n ni ai lam ni mung bin nga na re ngu kam ai.

Grau na Maigan de du nga ai Wunpawng Myusha ni grau na n ra sharawng na re ngu kam ai. Laika hpaji kung ai ni, Mungkan madang dep ai ni, Amyu hpe tsaw ra ai ni yawng gaw ndai Myen Asuya a Consititution hpe n ra sharawng ai, n hkap la ai lam in gaw bin ra ai, bin gin ai lam ni rai nga ai. Ndai hta an-hte myusha ni a gawng malai rai nga ai, Wunpawng Mungdan Shanglawt hpung KIO ni gaw, yawng n ra sharawng ai ndai Consititution hpe madi shadaw lai wa sai lam gaw, n galaw gin ai lam langai mi re ngu ngai mung kam ai.

Rai sa, shing rai yawng hpe jam jau jaw na ndai Consititution hpe KIO ni hpa majaw madi shadaw lai wa ai kun? Hpa majaw shi a Vote n bang ai ga sadi hpe n shatup ai kun? Myit yu hpa rai nga ai. KIO Salang ni shat n lu sha na hkrit nna kun? Myen hte hku hkau mayu nna kun? Myen hpe hkrit nna kun?

An-hte myusha ni hta grai manu dan ai langai mi gaw, masha langai hkrai hta myu tsaw myit kaba rawng ai re. Ti nang myusha wa matsan jam jau nga ai hpe kachyi mi mung n kam mu ai, n gwi yu ai amyu re. Ndai lam hpe Karai Kasang mung ra sharawng ai lam hpe, Yesu tsun dan ai Samari masha a lam hpe yu yang chye na re. Ti nang a majaw masha wa ngwi pyaw ai hpe sha mu ma yu ai, grai htap htut ai, myit masin lu da ai amyu re.

Ndai hta KIO a Consititution hpe madi shadaw ai lam hte hpa seng a ta? An-hte yawng myit sawn yu ga. Myen gaw KIO n madi shadaw ai hte majan bu na matu jin jin galaw da ngut ai hte KIO ni hku na mung shajin da ngut sai lam chye lu ai. Ndai hku majan shajin wa ai hta Myen a npu e rai nga sai Lasang Aung Hpung, NDAK hte KDA ni hpe Myen Asuya hku na kanu KIO hpe bai n htang kasat shangun wa na masa ni hpe mu lu ai. Ndai mabin gaw Karen mung e KNU hte DKBA hpung ni, myu shada gasat hkat nga ai mabin hte bung wa na masa hku re.

Ndai hku she rai yang gaw KIO mung si, Lasang Aung Hpung, NDAK hte KDA hpung ni mung si, lapran e nga ai Mung masha ni mung mara kata si ma wa let, hpang jahtum Myen Asuya ra sharawng ai hku Myu htum mat ai kaw shakre na hku re. Ndai hku kahpu kanau shada kasat gala ai gaw Karai Kasang n ra sharawng ai hpe Mungkan hta shawng ning nan masha bin wa sai Kain hte Abela yen nau a mabin hpe yu yang chye na na re.

Nye a jing hku nta hte seng nna ga shadawn jaw na nngai. Nye a katsa kaw kasha la kasha nga ai re. Nye a kahkau ngu na wa gaw Lasang Aung Hpung e du tai nga ai hku re. Bai shi a kanau ngu na wa gaw NDAK e magam gun nga ai hku re. Bai shan nau a kawa a kanau num sha gaw KIO Du Kaba langai mi a madu jan re. Bai, myit yu ga, ndai majan gaw bin ra ai kun n bin ra ai kun. An-hte Jinghpaw Wunpawng sha ni gaw shachyen dat ai hte kahpu kanau rai yang rai, mayu da ma rai yang rai re ai ni hkrai re. Nang na a hpu nau wa hpe sat gwi na kun? Nang na a mayu wa hpe sat gwi na kun? Nang na a dama wa hpe sat gwi na kun?

Ndai hku she rai yang shanglawt galoi she lu na ta? Ndai a hkyak ai, an-hte shanglawt lawt wa ai 40 ning jan, 50 ning de gale wa sai. Hpu shawng hpu ba ni du daw sai hkaw rai hpang da ai n dai shanglawt lam gaw ndai kaw shakre sai kun? N-re nga ai. An-hte Wunpawng sha ni shada gahkyin gumdin lam shawng a hkyak ai. Shing n rai yang myu shada sat hkat, nat hkat ai kaw shakre na re.

Dai majaw an-hte myusha ni ya ten galaw ra ai gaw gahkyin gumdin ai lam re. Ndai lam hpe madung dat galaw na matu Wunpawng Mungdan Shanglawt Hpung KIO ni hpe lajin mayu ai hku re. Shada shatan ai lam ni, arawng power shing jawng ai lam in hpe rap di kau let myusha ni yawng hpe zinlum na gaw ya ten ahkyak dik ai lam re. Marai masum myit hkrum yang panglai nawng pi dang htawk ai nga ai ga gaw Jinhpaw Wunpawng Myusha ni a matu yawng myit hkrum let Myen Asuya ngu ai hpe Wunpawng Mungdan kata kaw na htawk kabai kau na hpe tsun nga ai kun?

Ya magrau garang ai lam de bai myit yu ga. An-hte Wunpawng sha ni a KIO gaw masha n gun n law ai, Lak nak n lu ai, KNU zawn garum na masha ni nnga ai. US kun? UK kun? UN kun? Kadai mung makau kaw n nga ai. Moi BaKaBa nga ai shaloi gaw Miwa mung garum ai, rai tim ya ten Myen gaw Miwa hte hku hkau ai lam ni nga ai majaw Jinghapw Wunpawng sha ni a matu n gun yawm mat ai hku re. Hpyen hprim madun ai shaloi myu tsaw hpyen la ni grai n gun lu na zawn re ai rai tim AK47 ding sa ni hpe sha lu hpai ai hku re. KNU a hpyen hprim madun poi shi sumla ni hpe yu ai sha loi US made lak nak hkum hkra hpe mu lu ai. An-hte ni jin jin rai tim lak nak n lu nga ga ai. Moi Na Hpaw bum kaw Myen ni KIA hpe gawt shapraw kau lu ai gaw Lak nak n gun ja ai majaw re. Masha n gun ja di, magrau grang di n re. Kaja wa magrau grang ai gaw an-hte Jinghpaw Wunpawng sha ni re. Nang hpyen la galaw gawi a ni? Nang lak nak kaja lu hpai sa ni?

Dai majaw an-hte amyu sha ni gaw gahkayin gumdin let sha Myen hpe mai dang ai hku re. An-hte myu sha ni ti nang Mungdan ti nang lu up hkang sai lam, ti nang lagaw ti nang lu tsap sai lam hpe Mungkan ting chye hkra madun ra ai. Ndai lam ni hta a put a pai nga n tsun ai sha woi shakut na matu seng ang ai Du Salang ni hpe a ja a wa lajin dat ai hku re. Wunpawng sha ni yawng myit hkrum let...

Prat Dep Ai Jinghpaw Wunpawng Mungdan De......

Ta Tut

Matut Hti Na...

Hti Ngut Sai...

Lani mi na n htoi hta Wunpawng myu sha ni ........

N dai hkring dat hta ngai laika ngau ka lu na a hkang jaw ai, Karai Kasang a chyeju hpe shawng ning nan shakawn ai re.

Jing hpaw Wun Pawng sha ni yawng hte laika hku lu hkrum shaga hkra a hkang jaw ya ai kanau Ta Tut hpe mung grai chye ju dum ai re.

Shawng ning nan na ga ngau hku na ngai Lani mi na n htoi hta Wunpawng myu sha ni kara madang du na ta? ngu na Jing hpaw Wun Pawng sha ni a mabyin masa ni hte shing daw na garan gachyan mayu ai hku re. Htawm hpang de mung Wun Pawng sha ni hte ga ngau ni law law hte hkrum shaga mat na myit mada ai re law.

Karai Kasang a hpan da ai lam hpe an hte yawng hte gaw chye nga chya lu re. Karai Kasang gaw hpan da ai lam ni yawng hta La Mu hte A Ga hpe hpan da ai. Hpan da ngut ai LaMu hte A Ga kaw she Hka, Hpun Kawa, Yam Nga, Hkrung mahkrung mahkra nga n na hpan da ai. A Ga kawn she jat wa ai lam mu lu ai, a hkyak dik gaw Lamu ga re. Lamu ga ngu n nga yang hpun kawa, du sat, yam nga, shinggyin ngu ai ni n nga ai hpe myit dum mai nga ai.

Karai Kasang a hpan da hkrum ai shing gyim masha ni hta, ah hte Jing Hpaw Wun Pawng sha ni mung langai hku na lawm nga ai re. Jing Hpaw Mungdan (Kachin Land) hpe mung ap ya da hkrum sai re. Moi Iseal masha ni hpe hka nan mung de woi shang wa ai zawn, an hte hpe mung Ja, Lung Seng, n si nai si hte hkum ai WunPawng mung dan hpe madu na matu jaw ya sai re.

Yu li hku ten kaw na bum ga de naw ngam nga ai Wunpawng sha ni hpe pyi naw, layan ga de woi yu wa let, lung seng hku na sut su na a hkang jaw da lai wa sai. Hu Gawng ga hpe mung lamu ga sau hte jahpring shangun ai. Mung dan n pyaw wa ai majaw, Ja, lung seng mung mai gan ni she madu kau wa sai. Ga Sau hpring ai Hu Gawng ga, Sama ga, maigan ni she madu ma wa sai.
Ya hkyak hkyak sha pyi naw, Hu Gawng ga, hpe sut su ai, myen du ni hpe lak nak ni lu jaw ai, lak nak ni hpe manu hkyam sa ai hku na lu galai ya lu ai myen lau ban wa she madu ma wa sai re. Moi Ji woi Ji wa ni a prat kawn nga pra hkat wa ai Jing hpaw Wun Pawng sha ni a nga sat, nga sa, galaw lu, galaw sha ai lam ni hpe n sawn, sut ngu ai lamu ga hpe madu da ai lam hpe myi man n tau ai sha, Myen mung hpe madu nga ai, mung du ni gaw dut sha, galai sha ma wa sai re.
Lani mi na n htoi hta Wunpawng myu sha ni kara madang du na ta?

Lani hte lani Myen mungdan hta Kachin land ngu na n mying shingten jaw da ai lamu ga kaw nga nga ai Wun pawng sha ni gaw, Myen mung du ni a ga, a hkang a ya hta n tawt lai lu ai sha, ra ai n ra ai n nga, baw gum, ding yam let, madu a lamu ga hpe zin hkum, gawn la hkum mat ai shaloi, nga sha ra mat, sha hpa hkyet, nga wa ra ai ten du mat wa magang sai re. Bungli mat, nga shara byat mat ai shaloi gaw, kan a hpyi jahtau ai hpe n lawt lu ai sha, myen du ni kaw na lat nat hte galai, Wunpawng sha ni a lamu ga hpe zing la kau ai Myen sut du kaba wa a lata kaw na mayam tai wa na lam rai nga ai.

Myitkyina ga hta maigan masha law law, shin praw, shin na, ding dung, ding da ga na du wa ai mai gan myu ni gaw, loi loi rai na ganaw shang wa magang sai re. Mi nga nga ai W.P myu sha ni hpe gaw, kan ni, ja gum hpraw marit hkra galaw n htawm mayu sha mat nga sai re. Ah hte W.P shani gaw, Myen sut du ni a lata na mayam sha bai wa tai sha na kun? Kan ni, Ja gumhpraw a mayam tai nan mat sa na kun? Myen sut du ni a mayam tai let madu a lamu ga hta nai, mam hkai sha let sak hkrung mat sa na kun? Myit dum mai nga sai re law.

Matut Hti Na...

Hti Ngut Sai...

J.W Amyusha Ni A Mungmasa Shadam

May 14, 2008
Maling U Tu

Jinghpaw Wunpawng (J.W) amyusha ni moi...hpaji mung nau garai n chye ai jiwoi jiwa ni a prat hta gaw, grai magrau grang ai lam ni, sakse sakgan ni grai law la ai hpe mu lu ai.

Ya prat na Wunpawng Mungdan Shanglawt Hpung (KIO), uhpung uhpawng ni a ningbaw ningla ni gaw, shada gahkyin gumdin lam mung n galaw, shada shatan nhkan hkat, arawng power shing jawng, ningbaw n lu galaw jang uhpung garan pru, Wunpawng mungdan ginra hpe garan up sha, nhprang rai sutgan law ai shara hpe kashun sha, lahpa kaw ja dazik shakap shing jawng, mawdaw kaja jawn shing jawng, wutdek nta gap shing jawng, Myitkyina na htingra kaba lamu ga law malawng gaw shanhte du salang ni a hkrai rai malu ai.

Hpyenla ni gaw, jum, majap, si shum hta lai nna, shatmai hpa n lu sha ma ai. Mungmasa lam hta myit n hkrum, nang ra ai nang galaw, ngai ra ai mung ngai galaw rai nna, mungmasa shadam kau manu ai.

Anhte mungchying masha ni gaw gara de hkan na pyi n chye mat saga ai. Raitim, KIO uhpung uhpawng ni yawng hkrum ai langai mi gaw anhte mungchying masha ni mu lu saga ai. Dai gaw Myen hpyen asuya a Na-A-Hpa (SPDC) galaw ai roadmap lam yan (7) kaw na langai mi rai nga ai 'Mungdan Gawda Tara (nhprang)' hpe shagrin poi hta KIO, NDA-K, KDA, Lasang Awng Wa Hpung, KIO ni yawng, myit mang langai sha hte madi shadaw, rau sha rap rap ra ra hkap la manu ai.

Anhte mungchying masha ni grai kabu hpa langai gaw, ndai laknak lang hpung ni yawng myit hkrum ai hte rau pawng nna, KIO uhpung uhpawng langai sha tai wa na ma ai kun? ngu ai hpe lat yu saga!

Raitim, shaning (40) jan ning, (50) ning maga gale wa sai rawtmalan hkrunlam hta, hpu shawng hpu ba, du magam ni, amyu a matu ap nawng kau sai. Du daw salu salat n-gun atsam, ahkying aten ni gaw loi loi hte May Shata (10) ya 2008 ya daw dan shangut kau manu ai.

Mungkan hta hpyen sum ai gaw nau n hkrit ra ai. Naw sharai la mai ai. Mungmasa sum ai gaw amyu ting hpe shamat ai maga de woi bang wa ai rai nga ai. Karai Kasang a man hta mung, mungchying shawa a man hta mung, gumshem ladat hte n teng n man ai hku hkalem nna, mungmasa sadi run ai ni gaw htawm hpang prat du hkra ding nye lu na ma ai.

Tengman ai lam hta gwi gwi n tsap nna, n teng n man ai lam hpe chye ning len galaw ai wa mung, shu mashi shu masha ban hte ban prat hte prat ding nye lu na rai nga ma ai.

Anhte Jinghpaw Wunpawng amyusha ni gaw Mundan Gawda Tara (nhprang) hpe atang shalang hku nna sawn nga ga ai. Mungdan gawda tara nhprang hpe tara rap ra ai hku ka da ai mi rai rai, n tara ai hku ka da ai mi rai yang rai, jahkring jahkra galai mai ai baw n rai nga ai. Shaning law law aten la ra nga ga ai. Prat ban pyi galai wa chye nga ai hpe ya ningbaw ningla ni gaw dum nga ma ai kun?

Shing n rai, "wawn baw lai ngu jang, ning mai de hpa mi byin yang byin" ngu ai mungmasa rai kun? Htawm hpang prat na ramma ni hpe lam madun, lam waw da ya ai n nga ai sha, lam shamat, lam shadam kau da ai labau n tsawm ai ningbaw ningla, mungmasa uhpung uhpawng tai wa na hpe dum nga ra na ga ai. Shing n rai, hpyen asuya hpyen dap a n pu kaw nga nna, laknak mung naw lang lu na rai jang gaw ram sai ngu myit shadik kau masai kun?

Ya na zawn Na-A-Hpa galaw ai gawda tara nhprang hpe sha myit shadik myit pyaw ai hte hkapla na rai yang, hparai me anhte Jinghpaw Wunpawng myusha ni a du baw dai ram wa ap nawng kau ra na rai ta? Mungdan a matu share shagan asak hpe ap nawng kau sai hpu shawng hpu ba ningbaw ningla ni yawng mung katsan ga sumsing mungdan kaw na naw yu nga na ma ai.

Ya na zawn, hpyen wa hpe madi shadaw ai lam hpe mu jang chyaloi nhkoi, myit n dik, masin n si na masai. Dai majaw, dai ni dai na kaw nna gaw, anhte Jinghpaw Wunpawng myusha ni, n teng n man ai rai nga ai lam hpe gaw koi gam ra na ga ai.

Ndai zawn, n teng n man ai mungmasa lam hta gwi gwi n tsap yang, Karai Kasang ra sharawng ai rap ra ai tara lu la na n rai nga ai. Karai Kasang ra sharawng ai hku n rai jang, anhte Wunpawng amyusha ting hpe ding nye jaw na rai nga ai.

Dai majaw tengman lam hta gwi gwi hkawm ga ngu, ga saw dat n'ngai.

Matut Hti Na...

Hti Ngut Sai...

National Day For Pray!

Ka ai: La Shio Thu

American Mungdan hta May shata shawng ning nan bat 4 ya shani hpe American Mungdan ting hte seng ai kyu hpi n-htoi hku masat da ma ai. Nawku hpung shagu, buga hpung shagu ni hku na woi awn let Mungdan ning baw ningla ni, hpung lam, hpaji hparat lam, hpaga yung ga lam, Mung chying makawp maga hpyen dap hte mung shawa kaji kaba yaw a matu kyu hpyi ya ma ai.

Ya mung dai American Mungdan ting kyu hpyi n-htoi bai du wa ra ai. Ngai hku na yaw hpe saw shaga mayu ai lam gaw, Myen Mung Myusha ni yawng Mungdan kata kaw rai tim, nyi htep ai shara kaw rai tim, tsan gang ai shara kaw rai tim hkrisatan ni hkrai laksan n-re ai sha, myusha shagu, hpung shagu, kadai mung tinang kam sham ai hpung, amyu, ga ni hte rau kyu hpi na matu re.

Ya na zawn saw shaga ai a ning pawt gaw, Maigan mungdan e nga ai ngai na kana langai mi rau phone shaga hkup ai shaloi shiga la ngai mi hpe na lu ai. Shi mung maigan mungdan hta Myen Mungdan Kyit Hkai rung de galoi mung Tax (ah hkun) bang let bungli galaw nga ai re. Shi zawn rai tara shang bung li galaw ai manang ni hpe Myen Kyit Hkai rung kawn Referendum hpe madi shadaw na matu shaga let Mey (Vote) ni hpe bang shangun ai hku re. Masha nan sa ai rai tim Mey (Vote) mai sau pa gaw madi shadaw ngut chyalu (/) hpe langai hpang langai hta bang shangun ai re lam chye lu ai. Ndai zawn Mey (Vote) bang ai ni gaw hpa a matu bang ai lam hpe pyi n chye ai lam hpe mung chye lu ai.

Moi, laiwa sai (60) ning jan kaw na Myen Mungdan kaw nga ai Myu baw sang ni, Nawku hpung ni, mungmasha langai hkrai yawng gaw Mungdan rawt jat galu kaba wa na matu ladat amyu myu hte shakut lai wa ma sai. Sai hka hpawk lwi, asak law law ap nawng let shakut ai lam ni a majaw chyahkrai nmai, kasha sha mat ai kanu kawa law law mung rai wa sai. Dai ram shakut lai wa ai rai tim ya du hkra lawt lam n mu shi ai hku re.

An-hte ni yawng rau ti nang kam sham ai makam masham ni hte kyu hpyi na ten du sai ngu shadu ai majaw n dai laika hpe ka le yawng hpe saw shaga ai hku re. "Nanhte hpe aroi arip di ai ni a matu akyu hpyi mu" nga Luka A Laika 6:28 hta hta tsun da ai. An-hte ni yawng myi hkrum let ti nang nga ai buga na May shata praw 1, bat 4 ya, hkying 07:00 hta Myen Mungdan galu kaba lam, hpaji hparat lam, Mung masa lam, hpung lam ni yawng hpe lu galai shai let prat dep ai Mungdan de woi awn sa wa lu ai Ning Baw Ningla ni tai lu hkra ti nang kam sham ai Karai ni hpang de kyu hpyi ap nawng ga ngu ga saw lajin dat ai law.

The Original Myanmar Post Click Here .

PS: Ndai laika ngau hpe La Shio Thu hku na Myen laika rau ka dai ai hpe ngai bai Jinghpaw laika hku gale ka tawn ai majaw shut hpyit ai lam nga yang mara raw let sharai hti na matu tawng ban let hpyi lajin dat nngai.

Prat Dep Ai Wunpawng Mungdan De......

Ta Tut (T2)

Matut Hti Na...

Hti Ngut Sai...