Mung ga

2008 NING, FEBRUARY PRAW 5 YA SHANI 47 NING HPRING RAWT MALAN NINGHTOI SHANA SHAT SHA POI HTA KACHIN INDEPENDENCE ORGANIZATION (KIO) TINGNYANG UP MALAI II DR.MANAM TU JA TSUN SHAGA AI MUNG GA

Du sa ai Nu, Wa, Du Gyi salang ni hpe hkungga nngai. Yawng a matu a lu ai shana rai u ga.

Dai na na lu sha poi ndai hta e, ngai hku nna tsaw ra hkung ga ai Tingnyang Up a malai hkalum mungga shaga na ahkaw ahkang lu ai majaw nachying kabu arawng la nngai re. Sin dun Wunpawng sha ni a labau larang shang KIA Hpyen Dap hpaw hpang ai (47)ning hpring masat n'htoi poi shingra hta kahpu kawa KIO Tingnyang Up Salang Lanyaw Zawng Hra a shatsam shagrau ai shana lu sha poi hta sinpraw, sinna, dingdung, dingda, ni ai tsan ai shara shagu kaw nna hpun kawa n'dung hkrum rai sa du zup nga ai amyu a ningbaw ningla makyin jinghku ni, tsaw tsan ai shara ni kaw na du sa ai nja nhpra amyu sha ningbaw ni, lak san saw shaga hkrum ai rudi amyu sha u-hpung u-hpawng dat kasa ni, Mungdan hte Amyu a matu ap nawng shakut shaja nga ai u-hpung ni a dat kasa ni nawku makam masham hpung shagu na ningbaw ni hte du sa ai shawa yawng hpe Ginjaw Komiti a malai kabu hkinnum lu let hkap tau hkalum la nga nngai re. Ya na zawn ahkum ara sa du n'gun jaw ya shajang ai majaw nachying wa chyeju dum la sai.

Bai nna, n dai daram wa wu wu di di rai hkik hkam singhka ai poi kaba hpe awng dang hkra woi awn lit la ya nga ai poi shabyin shatai Komiti salang ni hpe mung prat dap yu ngwi mahkawn ka hkrang ni hte shangwi shapyaw zinlum ya ai yu ngwi ninghkring shayi shadang ni hpe mung, lam amyu myu hku nna shawang tsaw ra myit madu myit rawng rawng hte tinang dang di dang dep lu ai maga hku nna madi wa daw tai ya ai makyin jinghku myit rum ni yawng hpe mung tsun n dang hkra kabu chye ju dum la nga ga ai.

Ya dai na sim sa katsi pyaw ai aten hta anhte ni ndai zawn n'dut n'dang angwi apyaw mani sumsai n ma rai let hkrum zup hkat lu ai gaw sim sa lam a majaw nan rai nga sai. Sim sa lam lu yang she myit mang ai lam ni hpe awng dang hkra galaw la mai nga ai. Dai majaw, tinang KIO gaw sim sa lam hpe nachying wa ra sharawng nga ai. Lu hpang tawn ai sim sa lam hpe shagrin da nna grau grau jet ai, dam lada ai sim sa lam byin wa hkra lam tam akrai sa wa nga ai aten re. Sim sa lam ngu ai hta, Shara byin Benedet a dai ning na shaning n'nan mungga hta lawm ai hku nga yang "Trust, Justic, Equarlity and Freedom" ngu ai "Shada kam hkat ai lam, Tara rap ra lam, Maren mara ahkaw ahkang lam hte Ndut ndang wang lu wang lang lam"ngu ai ni hpring tsup ra nga ai. Ndai (4) kaw na langai ngai yawm mat jang jet ai sim sa lam n mai lu nga ai. Ndai gaw mungkan ting hkap la ai aga rai nga ai. Dai hta e munghpawm Myanmar mungdan kata na hku tsun ga nga yang "Amyu sha ahkaw ahkang lam" ngu ai naw jat bang ra nga mali ai. Mungdan a shingdu labau hte sat lawat amyu myu hta la kap nna tsun ga nga yang munghpawm Myanmar mungdan kata jet ai sim sa lam gaw gap lu na matu "Mungdan hpe munghpawm hkrang hku gaw de ra ai, Amyu sha mungdaw ni hta madu up hkang ahkang aya hpring tsup lu ra ai, Rudi amyu sha ni a ahkaw ahkang hpe chye na hkap la ya ra ai, Democracy masa lam yan jai lang ra ai" ngu ai lam ni gaw ahkyak madung rai nga ai. Mungdan up hkang ai Asuya ningbaw ningla ni dai hpe atsawm chye na hkan sa yang she ngang grin ai sim sa lam lu wa na re. Ya ten na sat lawat hpe maram yu ai shaloi mungdan asuya ningbaw ningla ni mung shing re ai pandung shadaw de du wa lu na matu lam waw ya hpang wa nga sai ngu mu lu ai. Asuya a Road Map ngu ai gaw mungdan kata e mungmasa galai shai wa lu na matu lam re ngu maram mu lu ai. N.C zuphpawng kaba ngut nna ya gaw, mungdan gaw da ai tara hpe ka hpang nga masai re. Dai tara buk nnan grin wa ai shaloi mungdan kata mungshawa a matu mai kaja ai lam ni byin paw pru wa na re ngu myit mada mai nga ai.

Nu Wa du gyi salang ni, hpa baw bungli hta rai timung ladat jaw yang she awng dang lu ai re. Myit ai hte mai byin ai ngu ai lahkawng nga nga ai. Ga shadawn tsun ga nga yang shinggyim masha yawng a myit hta gaw ya hka htung htu ya hka san ja lu mayu ai hkrai re. Rai tim dai gaw n mai byin ai lam rai nga ai. N mai byin ai ngu nna hka htung n htu yang galoi mung hka san ja lu lu na n rai nga. Myit galu hkam sharang let hka htung htu ai ni chyu sha lani mi hka san ja lu lu na rai nga ai. Bai, anhte gumhpraw lap latsa ra yang lap mi a manu hpe chye na ra na re. Lap mi yawm mat jang lap latsa n hpring lu ai. Lap jahku shi jahku sha rai nga ai. La ma lap latsa tup hpe kalang ta n lu mai jang, lap mi hte lap mi mahkawng nna lani mi lap latsa hpring hkra ladat shaw la chye ra nga ai. Tinang a lata de du wa ai gumhpraw hpe gara ten hta kadai jaw ai mi rai rai hpraw san ai myit hte jaw ai rai yang hkap la ra nga ai. Ung ang nga jang hpang hkrat mat na tsang ra ai. Ahkaw ahkang ngu ai gaw lahkawng lang gahtap na yak la ai da. Dai majaw anhte ra nga ai ahkaw ahkang, ahkang aya ni hpe kalang ta hpring tusp n lu mai ai rai jang lu mai ai aten hta lu mai ai made hkap la hpang nna gau ngwi ngwi jahpring shatsup la sa wa yang n mai na i? yawng jawm myit yu na lam langai rai nga ai.

Hpungdim hku tsun mayu ai gaw, anhte ni hpa baw wa galaw ai rai tim shawng lam a matu n'gun tai ra ai. Ya hte shang anhte hkrum tsup lu saga ai. Dai na mung sha ku ni kaw man hkrum rai dung let lu sha jawm sha na rai nga ga ai. Ndai zawn jawm hkrum tsup jawm hpawng de lu ai a marang e anhte yawng shada myit hkrum kahkyin gumdin lam grau grau maden singhka wa nna du na ra ai aten ni hta mungdan hte mungshawa a matu mai kaja ai bungli law law hpe lahkrip ra ra lata gindun let jawm gunhpai sa wa lu na saga ai ngu myit mada kam let hpung dim dat n ngai law.

Kachin Independence Organization (KIO) Tingnyang Up Malai (II)
Dr.Manam Tu Ja
Wunpawng Mungdan Shang Lawt Hpyen Dap
2008 ning, February 5 ya
Laiza Muklum

Matut Hti Na...

Hti Ngut Sai...

Mung ga

SALANG KABA LANYAW ZAWNG HKRA

WUNPAWNG MUNGDAN SHANGLAWT HPUNG GINJAW KOMITI TINNYANG UP, WUNPAWNG MUNGDAN SHANGLAWT KONGSI NINGBAW KABA, WUNPAWNG

MUNGDAN SHANGLAWT HPYEN DAP DAP UP DAJU

Matut Hti Na...

Hti Ngut Sai...

Mung ga

KACHIN INDEPENDENCE COUNCIL (KIC) NING BAW MALAI (l), KACHIN INDEPENDENCE ARMY (KIA) TAU DAP UP DAJU, LAT DU DAJU JUM DU KABA NBAN LA AUNG A 47 LANG AMYU SHA RAWT MALAN N-HTOI MASAT POI HPYEN HPRIM MADUN LAMANG HTA TSUN SHAGA SHATSAM AI MUNG GA

Myu tsaw, mung tsaw, myitrum share shagan ni! Wun Pawng Mungdan hte Munkan shara shagu hta, chyam bra nga ai, sindun sindu Wun Pawng Amyu sha ni a matu, aprat labau lareng shang Wunli Wungau hte hpring zup ai, daini gaw, Wun Pawng Amyu sha ni, dip sha hkrum ai prat kaw na, lawt lu na matu, laknak lang rawt malan hpang wa ai, (47) ning hpring, Wun Pawng Mungdan Shanglawt Hpyen Dap (KIA) hpe, daidaw dat ai, masat dingsat nhtoi rai nga mali ai. Mali shin hka, nhtoi hpuwa hta, ngai tut nawng tsawra kam hpa nga ai, myit rum share shagan manang ni hpe, n-gun jaw, shatsam mung ga shaga lu ai majaw, nachying wa, kabu hkinlum lu, sindai masin su let, Hpan Madu Karai Wa a shaman chyeju hpe mung, shakawn shagrau n ma, rai nga ai.

Share shagan ni! Ya daini, nang ngai asak apnawng nna galaw gunhpai nga ai magam bungli ndai gaw, tinang Amyu Sha ni a, tat sum kau nga ai, npawt nhpang shinggyim ahkaw ahkang hte, shadip jahpang uphkang ahkang aya ni hpe, bai lu la hkra, shani shana n sim n sa, shakut shaja, galaw gunhpai nga ai, Amyu Sha Rawt Malan bungli rai nga malu ai. Wun Pawng Amyu sha Rawt Malan Hpung ngu ai gaw, Amyu Sha Mungmasa Hpung, langai mi re. Dai zawn mungmasa lam yan hku nna, myit mada shatawng shada da ai hte maren, awng dang wa lu na matu, Hpyen dap a n-gun lam ra ai. Dai majaw 1961 ning, February shata praw (5) ya daini na aten hta, KIA Hpyen Dap hpe, hpaw shabawn dat ai rai nga ai. Anhte Amyu sha ni hpyen majan hpe ra sharawng ai majaw, majan gasat myu la ai majaw, dai zawn hpyen dap hpaw ai n re. Tingang a Amyu sha ni hpe, makawp maga na matu hte, Amyu sha Mungmasa lam, awng dang wa na matu sha rai nga ai. 1947 ning, February shata (12) ya shani, Pang Lung Zuphpawng kaw, anhte a hpu shawng hpu ba, du salang ni mung, myit hkrum lawm nna, Mung Hpawm Mungdan hpe, jawm hpaw gawde masat da saga ai. Pang Lung ga sadi hte maren nga yang, Munghpawm Myen Mung dan kata, shanau nga ai amyu sha ni yawng gaw, ankaw ahkang, rap rap ra ra lu ra na, amyu langai hte langai, sha da da dip sha hkat ai lam n nga na, kadai mung kade a ginra hpe, uphkang la sa wa na ngu ai re. rai tim mung, Myen Mung Shanglawt lu ai hpang, Asuya galaw ai Hp.S P L ningbaw ni gaw, Pang Lung ga sadi hpe hkan shatup ai lam n nga ai. Ru di amyu sha ni a ntsa mung masa hku dip sha ai. Sut masa hku, laba kaup ai. Dai hpe n kam hkam, n ra sharawng ai majaw, anhte Wun Pawng Amyu sha ni sha n rai, Mung Hpawm kat, nga ai kaga rudi amyu sha ni yawn mung, Paliman kaw simsa ai ladat hte, ahkaw ahkang hpyi yu sai. Rai tim mung, hpyen dap kaba hpe kam ai Asuya ning baw ni gaw, rudi amyu sha ni, hpyi shawn ai hpe tsep kawp n hkap la ya mai sha n ga mai gan masha ni a sumprat lawm ai ngu rim rawng a hkyak la wa ma ai.

Dai majaw, rudi amyu sha ni yawng, laknak lang rawt malan mat wa ai re. Myit rum share shagan ni! Anhte gaw, jaw ai myu tsaw lam yan hta tsap nna, tara ai majang hpe gasat nga ai ni rai nga ai. Dip sha ai hpe n kam hkam nna, asak ap nawng let rawt malan gwi ai amyu ni tingang a myu hte mungdan hpe tsawra chye ai ni re ngu anhte hpe mung kan kaw nna mung masat masa galaw ya ng ma ai. Shang Lawt Hpyen anhte hpe mung kan kaw nna mung, masat masa galaw ya nga ma ai. Shang Lawt Hpyen Dap nga ai majaw, tinang amyu kata, grau kahkyin gumdin wa ai, masa amyu ni e yu roi, yu kaji ai lam n nga ai. Masha langai hkrai hta, myu tsaw myit, grau ngang kang wa ai. Ndai zawn re akyu amyat ni hpe, lu la nga saga ai. Lama wa n chye rawt malan ai amyu ni r ai ga yang gaw, ya dai ni na aten hta, amyu pyi mat na daram, grit nem kaji gadun mat wa sana, ga ai re. Rai yang, rawt malan chying hkrawng galu mat wa ai majaw, magam gun ni mung, mung shawa ni mung, masa nkau mi, myit daw myit hten, gawng run, aput apai nga ai lam hpe na alu ai. Teng ai, (40) jan ning ngu ai gaw, ram ram galu ai aten ladaw, langai gaw rai nga sai. Dai zawn n myit mada ai sha, rawt malan aten ladaw ren mat wa ai gaw, Policy shut nna n re, kaga ra rawng gawng kya ai lam, n kau mi a majaw re, ngu nna tsun mai ai. Amyu sha Rawt Malan majan lagai awng dang na matu, tinang lagaw, tinang tsap ai ladat, lang sa ra wa ai hta sha n ga grup yin htingbu Mungdan ni kaw na, garum ningtum mung lu ra nga ai. Ya dai ni KIO gaw, tinang lagaw tinang lagaw tinang tsap ai lam hta tsep kawp ngang sai, hpring tsup sai ngu tsun lu ai. Rai timung, Shinggan htingbu htingbyen Mungdan ni kaw na garum ningtum lam, tsep kawp n lu mai ai. Anhte a ningbaw ningla ni, gade daram shakut tam abram yu timung, myit ai made n mai byin ai. Dai re majaw tinang hta grau n-gun kaba ai, hpyen dap lu ai Asuya hpe, dang hkra gasat kau n matu, n loi nga ai. Awm Dawm Shang lawt lu na matu, 1961 ning kaw nna, 1976 ning du hkra, shaning (15) ning tup, myit si myit sat, laja lana, gasaat wa yu saga ai. Rai timung, awng padang garai n lu mai nga ai. Rai yang, mungkan a sat lawat gaw, lani hte lani, galai shai mat wa nga ai hta hkan nna, hpu shawng hpuba, ningbaw ningla ni gaw 1976 ning hta, Munghpawm kata matut nga na, Munghpawm kaw nna, n-ga garan pru na, tinang a mungdaw kata, jet ai madu uphkang ahkang aya lu ra na, ngu ai policy jahkrat lai nhtawm, lapran kaw ninggam langai mi shawng kabye shangang na matu, dai pandung shadaw de shawng du lu hkra, woi awn shamu shamawt, sa wa nga ai re. Mung hpawm nga timung, anhte Wun Pawng Amyu sha ni lawm nna, jawm hpawng ai munghpawm she re ai majaw, de kata kaw e, nga na ngu ai gaw, grit nem mat ai lam, yawm mat ai lam n rai nga ai. Anhte a hpang jahtum na, awng padang pandung shadaw de, teng sha du lu na matu, lapran kaw, lagaw lahkam langai, htawt kabye jat ai lachyum sha re nga ai hpe yawng chye na da ga.

Share shagan ni! Mungmasa lam hte seng nna, kaji mi tsun mayu ai. Shainggyim uhpawng langai mi a matu, mungmasa gaw ahkyak dik re. Amyu sha langai mi a mungmasa, asak hkrung sha mu sha mawt lu nga na matu, dai hpe makawp maga madi shadaw ai, amyu sha hpyen dap nga ra ai. Dai majaw, anhte Wun Pawng amyu sha ni mung amyu sha bung li hpe woi awn sa wa nga ai, KIO a npu e, KIA Hpyen Dap hpe hpaw tawn ai rai nga ai. Dai zawn hpyen dap hpaw da lu ai majaw, ya daini na zawn, KIO gaw mungmasa lahkam ni hpe shawng de jaw jaw htawt sa wa lu ai rai nna, 1994 ning, February shata (24) ya shani, N.W.T Hpyyen Dap Asuya hte san sadang nga ai hku, gap hkat shazim tawn ai re. Dai hpang, mungmasa manghkan hpe, saboi ntsa e bawngban jahkrup, hparan la lu hkra ngu shakut lam tam sa wa ai gaw, ya daini du hkra rai nga ai. Tinang KIO a Policy kaba langai mi gaw, mungmasa a majaw byin ai manghkang hpe mungmasa ladat hte, saboi ntsa e, bawngban jahkrup hparan la sa wa na, ngu ai re. Dai majaw, Ginjaw Komiti gaw, du daw, sai hkaw, law ai hpyen majan pa kaw nna, saboi ntsa de gyin dat ai re. Ya ten hta, anhte zawn, tinang amyu sha lawt lam a matu, laknak lang, rawt malan nga ai, uhpung ni yawng mung dai hku sha galaw nga ma ai. Rai yang, gap hkat shazim ai a ntsa, masah akau mi, tsun dinglun ai lam nga ai. Tinang KIO, gap hkat shazim tawn ai, hpa akyu jat ai lam ngu ai hpe, joi jang hte shen yu ai zawn, ta tut mabyin matu mahtai ni hpe myuyit dinglik yu ra ai. Akyu rawng ai lam, law law nga ai hpe mung, mu lu ra ai. Ga shadawn; Mungshawa ni, n dut n dang hkawm sa shamu shamawt lu ai, hpaju hparat lam, hkamja lam, sut lu nga mai lam hte buga gaw sharawt lam ni hpe wang lu wang lang galaw la, sa wa lu ai. Nam hte Myo lapran, madin n nga ai sha, Mungchying mungshawa shada, n dut n dang, ganawn mazum, hkrum hkat lu ai gin jaw Komiti hku nna mung, Mungmasa bungli ni hpe, grau tang du hkra, galaw sa wa lu nga ai. Dai gaw, anhte a matu, akyu rawng, amyat pru ai lam ni, rai nga ai.

Share shagan ni! Dai ni na Myen Mung a, mungmasa sat lawat hpe mung dep hkap ai made, mu mada chye na da ra ai. Mungdan kata, mungshawa yawng, Dimokaresi masa hpe ra sharawng, hpyi jahtau nga ma ai. Kalang lang, Asuya hpe ninghkap ai, shawa n gun madun poi kaba ni pyi byin paw pru wa nga ai. Mungkan ting mung, Dimokaresi chyinghka hpe, hpaw ya ra nga sai. Hpyen Dap Asuya a, mungmasa lam masan hpe, atsawm maram yu ai shaloi, mungdan kata, Dimokaresi masa hpe, jai lang hpang sa wa na matu, lam hpaw ya ai lachyum re ngu, mulu ai. Ya ten du hkra rai yang, Mungdan Mungbawng Zuphpawng kaba hpe, galaw shangut lu nna, mungdan gaw da ai tara nnan hpe, ka tawn nga masai. Nau n na yang ngut sana re. Myen mung a mungmasa sat lawat hta, hkan nna hpring tsup ai Dimokaresi mungdan byin wa hkra, kalang ta galai shai shangun na matu, n mai byin nga ai. Lagaw lahkam langai hpang langai, htawt sa wa ai hku sha, mai nga ai. Tinang KIO hku nna, shatawng shada da ai gaw, jet ai munghpawm gaw de na, Rudi amyu sha ni, tinang a gam maka, tinang jum hpajang sa wa lu ai, jet ai madu uphkang ahkang aya lu ra na, rudi amyu sha ni, ahkaw ahkang hpring tsup lu ra na ngu ai re. Dai pangdung shadaw de du lu na matu, lagaw lahkam, langai hpang langai, htawt sa wa ai, ladat lang ra nga ai. Dai majaw tinang KIO gaw, ya dai ni Hpyen Dap Asuya woi galaw sa wa nga ai aten re. Anhte rudi amyu sha ni gaw, Dimokaresi hpe sha, lu nna n ngut ai, amyu sha ahkaw ahang mung, lu ra nga ga ai. Dai lahkawng hpe, aten langai mi hta sha, lu la wa hkra, ladat shaw, lam tam sa wa ra ai. Tinang a, ahkaw ahkang ngu ai hpe, lu mai ai aten hta, lu la mai ai made, shawng hkap la hpang nna, hpring hpring tsup tsup lu wa hkra, a ngwi ngwi, bai jat la sa wa ra nga ga ai. Manu manat, aten shalai kau n mai ai. Lu mai ai ahkaw ahkang hpe, tat sum kau na tsang ra ai. dai zawn, amyu sha mungmasa hpe, myit galu let, zai rawng rawng hte, n sim n sa ladat shadaw ra ai.

Sha re shagan ni! KIA gaw Myutsaw, Mungtsaw Hpyen Dap, Mung shawa a Hpyen Dap Re. Nchyang mayam hpyen dap n re, ngu ai hpe galoi n mai malap ai. KIA Hpyen Dap, n-gun ja, ningja rawng na matu, anhte yawng gaw lit nga ai. Hpyen la greng yang she, Hpyen Dap greng na rai nga ai. Dai majaw, anhte Hpyen Du, Hpyen Gyi, Hpyen ma ni yawng greng ra ai Dap a ritkawp tara kan ra ai. Dap kata, gahkyin gumdin, makai hkak ra ai. Ntsa npu kanawn mazum lam, htap htuk ra ai. Aming chye ra ai. Tsang hte tsang hkungga lara chye ra ai. Tingang a laknak hpe, tinang a sak hte maren, tsawra lanu lahku chye ra ai. Ningja rawng ai Hpyen Dap byin lu na matu, masha n-gun, laknak n-gun ja ra ai. Hpyen magam gun ni, tinang a dap hpe, tsawra myit dun ra ai. Nga chyalu masha n-gun hte laknak n-gun hpe hkang zing ra ai. Yawm mat ai n-gun hpe bai tam jahpring ra ai. N-gun nnan tam jat bang ra ai. Majan zai ladat ni hpe ten tup shaman shakyang nga ra ai. Dai shaloi gaw, Hpyen Dap n-gun grau grau kaba wa ai hte ningja rawng ai Hpyen Dap byin wa na re. Ya ten hta, tinang KIA Hpyen Dap gaw, htim gasat majan hpe, jahkring tawn nna, hkap ninghkap majan hpe shagreng nga ai aten re. Raitimung, htim ganawng gasat majan a matu, galoi mung, jin jin rai nga ra ai, myutsaw masa, Dimokaresi masa, Mungshawa nga mu nga mai lam masa, tinang lagaw tinang tsap masa hte mungshawa hte Hpyenla hka hte nga zawn nga ra ai, ngu ai masa ni hpe, tutu nawng hkam la hkan sajang mu. Tinang KIO hpe jahpoi jahpyak, shatan n hkan nga ai ga ni hpe, n mai madat ai. Shanglawt a ntsa, tutnawng sadi dung kam hpa ra ai.

Hpungdim hku nna tsun mayu ai gaw, kaga magam dap hkan na, magam gun shawa ni hte mung, mungchying sha ntang hte mung, ahkrum ara rai, kahkyin gumdin ra ai. Lachyen lahka re ai lam, n mai galaw ai. Hpyen la ngu ai ni gaw, sinat lang ai ni re majaw, myit kaba gumrawng nna, kaga masha ni a ntsa gumshem sindawng mayu ai myit, rawng wa chye ai. shagrit shanem, myit galu hkam sharang ra ai. Shada da shamyet shanat, madi shadaw hkat yang she bungli awng dang ai re. Tingang KIA gaw, amyu sha mungmasa hpyen dap, mungshaw hpyen dap re ai majaw, anhte a lit gaw, majan gasat na matu san san sha n re, kahkyin gumdin bungli hte, mungshawa ni hpe garum ning tum a lit mung, nga ai. Masha nkau mi majan gasat ai ngu ai hpe, ahpa atang hku sha sawn nga ma ai. Majan gasat ai ngu ai gaw, jaw ai policy npu e, masing atsawm jahkrat nna galaw yang she, awng dang lu ai. Britisha Hpyen jaubu Mongguman tsun ai, tinang sum na majan hpe gaw n gasat ma ai da.Tinang KIA Hpyen Dap mung, sum na majan hpe gaw n mai gasat na re. Amyu sha akyu ara a matu lai n lu rai nna, majan gasat ra wa yang mung, dang hkra, gasat ra na ga ai. Dai re majaw, KIA Hpyen Dap gaw, galoi mung gasat poi shang na jin jin rai nga ra ai. Share shagan ni yawng, atsam ningja hte hpring zup ai Hpyen Du, Hpyen Gyi, Hpyen Ma ni rai wa lu hkra, tut nawng dating shakut shaja sa wa mu. Ginjaw Komiti a lam woi awn ai npu e aput angun n nga ai sha, myit tsu myit rawt let, lahkrip ra ra hkan nang hkan sa shajang nga mu ngu, n-gun jaw shatsam let, hpungdim dat nngai.

KIC Ning Baw Malai ( l )

Lat Du Daju Jum Nban La Awng

Tau Dap Up Daju Wunpawng Mungdan Shanglawt Hpyen Dap

2008 ning, February praw (5) ya. Laiza Muklum.

Matut Hti Na...

Hti Ngut Sai...