May 14, 2008
Maling U Tu
Maling U Tu
Jinghpaw Wunpawng (J.W) amyusha ni moi...hpaji mung nau garai n chye ai jiwoi jiwa ni a prat hta gaw, grai magrau grang ai lam ni, sakse sakgan ni grai law la ai hpe mu lu ai.
Ya prat na Wunpawng Mungdan Shanglawt Hpung (KIO), uhpung uhpawng ni a ningbaw ningla ni gaw, shada gahkyin gumdin lam mung n galaw, shada shatan nhkan hkat, arawng power shing jawng, ningbaw n lu galaw jang uhpung garan pru, Wunpawng mungdan ginra hpe garan up sha, nhprang rai sutgan law ai shara hpe kashun sha, lahpa kaw ja dazik shakap shing jawng, mawdaw kaja jawn shing jawng, wutdek nta gap shing jawng, Myitkyina na htingra kaba lamu ga law malawng gaw shanhte du salang ni a hkrai rai malu ai. Hpyenla ni gaw, jum, majap, si shum hta lai nna, shatmai hpa n lu sha ma ai. Mungmasa lam hta myit n hkrum, nang ra ai nang galaw, ngai ra ai mung ngai galaw rai nna, mungmasa shadam kau manu ai.
Anhte mungchying masha ni gaw gara de hkan na pyi n chye mat saga ai. Raitim, KIO uhpung uhpawng ni yawng hkrum ai langai mi gaw anhte mungchying masha ni mu lu saga ai. Dai gaw Myen hpyen asuya a Na-A-Hpa (SPDC) galaw ai roadmap lam yan (7) kaw na langai mi rai nga ai 'Mungdan Gawda Tara (nhprang)' hpe shagrin poi hta KIO, NDA-K, KDA, Lasang Awng Wa Hpung, KIO ni yawng, myit mang langai sha hte madi shadaw, rau sha rap rap ra ra hkap la manu ai.
Anhte mungchying masha ni grai kabu hpa langai gaw, ndai laknak lang hpung ni yawng myit hkrum ai hte rau pawng nna, KIO uhpung uhpawng langai sha tai wa na ma ai kun? ngu ai hpe lat yu saga!
Raitim, shaning (40) jan ning, (50) ning maga gale wa sai rawtmalan hkrunlam hta, hpu shawng hpu ba, du magam ni, amyu a matu ap nawng kau sai. Du daw salu salat n-gun atsam, ahkying aten ni gaw loi loi hte May Shata (10) ya 2008 ya daw dan shangut kau manu ai.
Mungkan hta hpyen sum ai gaw nau n hkrit ra ai. Naw sharai la mai ai. Mungmasa sum ai gaw amyu ting hpe shamat ai maga de woi bang wa ai rai nga ai. Karai Kasang a man hta mung, mungchying shawa a man hta mung, gumshem ladat hte n teng n man ai hku hkalem nna, mungmasa sadi run ai ni gaw htawm hpang prat du hkra ding nye lu na ma ai.
Tengman ai lam hta gwi gwi n tsap nna, n teng n man ai lam hpe chye ning len galaw ai wa mung, shu mashi shu masha ban hte ban prat hte prat ding nye lu na rai nga ma ai.
Anhte Jinghpaw Wunpawng amyusha ni gaw Mundan Gawda Tara (nhprang) hpe atang shalang hku nna sawn nga ga ai. Mungdan gawda tara nhprang hpe tara rap ra ai hku ka da ai mi rai rai, n tara ai hku ka da ai mi rai yang rai, jahkring jahkra galai mai ai baw n rai nga ai. Shaning law law aten la ra nga ga ai. Prat ban pyi galai wa chye nga ai hpe ya ningbaw ningla ni gaw dum nga ma ai kun?
Shing n rai, "wawn baw lai ngu jang, ning mai de hpa mi byin yang byin" ngu ai mungmasa rai kun? Htawm hpang prat na ramma ni hpe lam madun, lam waw da ya ai n nga ai sha, lam shamat, lam shadam kau da ai labau n tsawm ai ningbaw ningla, mungmasa uhpung uhpawng tai wa na hpe dum nga ra na ga ai. Shing n rai, hpyen asuya hpyen dap a n pu kaw nga nna, laknak mung naw lang lu na rai jang gaw ram sai ngu myit shadik kau masai kun?
Ya na zawn Na-A-Hpa galaw ai gawda tara nhprang hpe sha myit shadik myit pyaw ai hte hkapla na rai yang, hparai me anhte Jinghpaw Wunpawng myusha ni a du baw dai ram wa ap nawng kau ra na rai ta? Mungdan a matu share shagan asak hpe ap nawng kau sai hpu shawng hpu ba ningbaw ningla ni yawng mung katsan ga sumsing mungdan kaw na naw yu nga na ma ai.
Ya na zawn, hpyen wa hpe madi shadaw ai lam hpe mu jang chyaloi nhkoi, myit n dik, masin n si na masai. Dai majaw, dai ni dai na kaw nna gaw, anhte Jinghpaw Wunpawng myusha ni, n teng n man ai rai nga ai lam hpe gaw koi gam ra na ga ai.
Ndai zawn, n teng n man ai mungmasa lam hta gwi gwi n tsap yang, Karai Kasang ra sharawng ai rap ra ai tara lu la na n rai nga ai. Karai Kasang ra sharawng ai hku n rai jang, anhte Wunpawng amyusha ting hpe ding nye jaw na rai nga ai.
Dai majaw tengman lam hta gwi gwi hkawm ga ngu, ga saw dat n'ngai.
