Tuesday 26 August 2008

Thai PM wa Aung San Suu Kyi lawt na lam hta a ten n ja htum na matu UN hpe tsun, Jan Aung San Suu Kyi lu sha n sa sha a ngun mat

>

Ta Tut
Kachin Road Group
26/8/2008

Thai Mungdan a Prime Minister rai nga ai Samak Sundaravej wa gaw sinna Mungdan kaba ni hku nna Myen Mungdan hpe Democracy lu hkra shakut ai lam hta Myen Asuya a kaba dik Mung masa hpyen rai nga ai NLD hpung a ning baw Jan Aung San Suu Kyi a lawt lu lam hpe shakut ai lam hta n galaw sana hku tsun shadut wa ai lam chye lu ai. Aung San Suu Kyi hpe shalawt na matu shakut ai lam gaw a ten jahtum ai sha re nga tsun ai hku re.

Mr Sundaravej gaw Myen Mung de lai wa sai bat laman du sa ai UN dat kasa Ibrahim Gambari hpe e Aung San Suu Kyi hpe dat na matu shakut ai hpe jahkring kau nna 2010 ning hta galaw na rai nga ai Myen Asuya a ra lata poi hpe she grau madung dat ngun jaw na matu tsun wa ai. Aung San Suu Kyi hpe jahta na malai Asuya galaw ai Hpyen jau bu kaba ni hte Mungdan rawt galu kaba wa lam jahta yang grau nna mai kaja na re lam tsun shadut wa ai.

Bai shi gaw matut manoi Mungkan Mungdan kaba ni hku nna Myen Mung hpe Democracy lu hkra galaw ya mayu yang gaw Aung San Suu Kyi lawt lam hte shi hte stun jahta na lam ni hpe shakut ai lam shayawm kau ra sai hte Asuya galaw ai ni hpe mahtang a sawng ra ai nga tsun wa ai hpe ABC shiga dap kawn chye lu ai. Ndai ga gaw Aung San Suu Kyi jan UN dat kasa wa rau hkrum zup na lam hpe n dang kau ai majaw mung rai na re ngu myit sawn nga ma ai.

Dai sha nnga ya ten Jan Aung San Suu Kyi gaw ya ten lu sha ni hpe n sha ai sha nga nga ai gaw bat hku rai wa sai lam shi hpe lu sha ni hpe sa ya ya re ai NLD kawn na masha ni kawn chye lu ai. Shi hpe hpang jahtum lu sha sa ya ai gaw ndai shata 15 ya shani kawn rai sai lam hte lu sha ni hpe n sa ra sai lam Aung San Suu Kyi kawn tsun da ai lam chye lu ai. Ndai lam hte seng nna NLD a ning baw ni loi li mau nga ma ai lam chye lu ai.

Jan Aung San Suu Kyi ndai zawn galaw ai gaw lu sha n sha ai sha n gun madun (Hunger Strike) ai ga kun nga mung stun tak nga ma ai. Rai tim NLD a ning baw langai mi rai nga ai Nyan Win gaw "Shi hku nna Hunger Strike n gun madun na lam gaw n mai bin ai, kaga hpa baw lam a majaw kun" nga tsun ai hku re. Rai tim ndai shiga ni gaw teng n teng hpe a tsawm rai n chye shi ai lam chye lu ai.

Template by - Abdul Munir | Daya Earth Blogger Template